TAGBILARAN City, Bohol, July 8 (PIA) -- Mismo si Mayor Janette Aurestila Garcia inubanan sa iyang hamiling kapikas nga si Private Secretary Antonio Garcia Jr. ang nagpakita sa iyang mga konstituwente sa ilang pagpabakuna og Sinovac, gahapon.

Kini human sa upat ka buwan human gisugdan sa Bohol ang vaccine roll-out, nga maoy gituohan sa mga eksperto sa kasanihan nga bugtong panalipod sa mga komunidad sa pagkuyanap pa sa sakit nga mananakod. 

Ang pagpabakuna sa Mayor ug sa iyang kapikas, isip pagpakita usab og lig-on nga suporta alang sa nagpadayung kampanya sa pagpabakuna sa katawhan batok sa Coronavirus Disease (COVID-19).

Matod sa Mayor, nagpasalamaton siya sa Vaccination Team nga gipangunahan ni Municipal Health Officer Dr. Narlou A. Weceslao, alang sa ilang wala’y hunong nga pagserbisyo aron masiguro nga ang tananh katawhan mabakunahan batok sa Covid-19.

Ang Talibon usa sa mga labing unang lungsod sa Bohol nga naghimo og community lockdown diha nga usa sa ilang mga isla nga barangay nakaangkon og usa ka kaso sa kamatayon sa COVID-19 sa Agosto miaging tuig.  

Dala sa kahadlok ug pagseguro nga dili na makaangin pa sa ubang lugar, ang lockdown sa isla sa Guindacpan, epektibo usab nga nakakontrolar sa paglanat sa sakit. 

Hinuon, sanglit usa sa mga labing dagko nga lungsod sa Bohol, ang kampanya sa pagpabakuna, wala kaayo motuhop ngadto sa mga komunidad, diin ang mga tawo una nga nakakuhag sayup nga kasayuran diha sa internet. 

Niini, giawhag usab sa Mayor ang tanang katawhan dili angay nga mabalaka, dili angay mahadlok ug dili magduha-duha nga magpabakuna, tungod kay dugang kini nga proteksiyon sa lawas batok sa niini nga sakit. (RAHC/PIA7 Bohol/Ruffa Mae F. Evardo)