TAGBILARAN CITY, Bohol, July 13 (PIA) -- Sa nagpadayon nga pagpakigbisug sa kagamhanan sa pagtapos na sa local nga kaguliyang dala sa armadong pakigbisug, sa kriminalidad, terorismo ug illegal nga drugas, gitugyan ni Chief Philippine National Police (CPNP) Police General Guillermo Lorenzo Eleazar ngadto sa Bohol Provincial Police Office ang 60 ka Galil 5.56mm Basic Assault Rifle ug liboan ka mga bala, mga magazines ug kompleto nga accessories niini.

Ang Galil BAR, usa  ka automatic nga hinagiban nga maoy gigamit sa Israeli Defense Forces isip ilang adaptation sa AK 47 ug giila nga usa sa mga labing kasaligan nga assault rifles sa tibuok kalibutan. 

Sa iyang labing una ug possible nga katapusan nga pagduaw sa Bohol sa iyang nahibiling 4 na lang ka buwan nga pag-alagad sa kapolisan, si Gen Eleazar, kang kinsa nga administrasyon nagtutok sa Intensified Cleanliness Policy sa buhatan, organisasyon sa kapolisan ug sa komunidad, gipadayag sa hepe sa PNP ngadto sa mga  hepe sa kapolisan sa Bohol nga mitambong sa iyang pagbisita sa Kampo Dagohoy.

 Gawas sa pagtugyan sa mga armas ngadto sa Bohol Police Provincial Office, gitusok usab sa hepe sa PNP sa nasud ngadto sa dughan sa duha  ka Bol-anong pulis ang ilang mga Medalya sa Kaisug, sa mga kalampusan niini sa kampanya sa kriminalidad ug sa illegal nga drugas.   

 Gihatagan sa pasidungog pinaagi sa medalya si Police Major John Kareem Escober, kinsa maoy nagalagad sa warrant sa usa  ka giila nga supporter sa kalihukang walhon nga nagasagap usab sa mga armas ug buhing bala samtang si Police Lieutenant Jose Leander Velasquez maoy nakadakop sa usa  ka high value drug personality ug nakakuha sa kapin sa P600 mil nga bili sa drugas.

Gawas niini, gipahibaw usab sa CPNP nga may 16 ka mga body cams nga itugyan ngadto sa mga sakop sa kapolisan sa Tagbilaran.

Matud niya, ang 12 ka mga City Police Offices sa Central Visayas, lakip na ang Tagbilaran City Police Station maoy una nga makadawat sa body cameras nga magamit sa kapolisan taliwala sa pasangil nga daghang raids sa kapolisan ang adunay mga kwastyonable nga pagpadagan.

Wala may napahat nga body cams alang sa BPPO, gipadayag ni Gen Eleazar nga may pagtugot na sa Korte Suprema ang paggamit sa mga kapolisan sa mga alternatibong recording device sa paghatag og buhi nga ebidensya sa pagsubay sa balaod sa mga mahitabo nga raids.

Gipadayag pa usab sa hepe sa kapolisan nga wala p[ugngi ang mga maayo og kabubut-on nga motabang sa kapolisan sa pagpamalit sa mga body cams kon nakit-an gayud ang krusyal nga tabang niini sa pagpatuman sa balaod ug pag putol sa mga hugaw nga buhat sa mga kapolisan nga maoy nagdamay sa limpyong ngalan sa mga anaa sa pwersa. (RAHC/PIA7 Bohol)