SIQUIJOR, Siquijor, July 19 (PIA) -- Ang Kagawaran sa Agrikultura (DA) pinaagi sa Provincial Agriculture Technology Coordinating Office (PATCO) sa Siquijor mihatag bag-o pa lamang og P13,261,050 ngadto sa lokal nga kagamhanan sa Siquijor.
Ang ceremonial turnover gihimo sa Provincial Governor's Office kauban si Cong. Jake Vincent Villa ug Gobernador Zaldy Villa nga nagpasalamat sa DA sa padayon nga pagsuporta sa mga mag-uuma sa Siquijor.
Sa kinatibuk-an, P10.7 milyon nga gipondo ilawom sa programa nga Special Area for Agricultural Development (SAAD) agi og suporta sa mga proyekto niini, may duolan sa P6 milyon nga gigahin alang sa Livestock Production Project.
Naglangkob kini sa duha nga mga proyekto sa pgpapalambo o pagpadaghan sa baka ug kanding nga gitawag upgraded cattle production ug upgraded goat production.
Dili moubus sa 160 ka mga mag-uuma ang napili aron makabenepisyo sa proyekto, diin 100 niini ang mga nagpatubo sa baka ug 60 sa kanding.
Sa ilawom gihapon sa programa nga SAAD, gitagana ang P4,640,000 alang sa chicken egg production project kon proyekto sa pagpadaghan og itlog sa manok nga adunay 100 ka mga beneficiaries sa mag-uuma.
Laing P2,546,050 nga kantidad nga pondo sa ilalum sa High Value Crops Development Program (HVCDP) ang gitunol aron suportahan ang pagpatuman niini sa probinsya.
"Daghang salamat. Gipaabot ko ang padayon nga suporta gikan sa Department of Agriculture aron mapaayo ang produktibo sa agrikultura sa Siquijodnon," sumala pa ni Villa.
Ang pag-turnover gipangulohan sa ACC III / Agriculture Provincial Coordinating Officer Gregolito Bunado ug ACC II Bernadith Bunado, gisaksihan ni Provincial Veterinarian Dr. Bernardita Tabada ug Supervising Agriculturist Merlita Yabo gikan sa Provincial Veterinary Office ug Provincial Agriculturist Emiglio Coretico, officer-in-charge sa ang Provincial Agriculture Office, SAAD Provincial Coordinator Agnes Guanella Cafe, ug High Value Crops Development Program Coordinator Sul Adrian Dahunan. (RAC/PIA7 Siquijor/Dan Razzi Yabo & Mary Jane Banglos, DA-Siquijor)
