TAGBILARAN CITY, Bohol, July 21 (PIA) -- Nagmando si Philippine National Police (PNP) Chief, Gen. Guillermo Eleazar sa mga hepe sa kapulisan nga magbutang ug dugang kapulisan sa mga publikong mga lugar aron malikayan ang pagtapok sa mga katawhan nga mahimong hinungdan sa dali nga pagkatap sa gikahadlokan nga Delta variant sa COVID-19.

Niini, nagpagawas ug kamandoan si Eleazar, human mipadayag si Department of Interior and Local Government Secretary Eduardo Año nga kinahanglan niya ang PNP ug uban pang tigpatuman sa balaod nga palig-onon ang ilang presensya sa publikong mga lugar aron masigurong ma-obserbahan ug malikayan ang tapok sa mga katawhan.

Miingon usab siya nga kinahanglan ipiho sa mga pangulo sa kapulisan kung pila pa ang kinahanglanon nga pulisya aron masiguro ang seguridad sa pangpubliko nga mga lugar ug uban pang establisamento nga nasulod sa ilang responsibilidad.

Dugang pa niya sa usa ka pahayag, ang pagpatuman sa mga protokol kinahanglan nga hiniusa nga buhaton sa mga kapulisan ug mga lokal nga opisyal, ilabina ang mga trabahante sa barangay.

Kini, gipasalig ni Eleazar nga ang PNP hugot nga makigtambayayong sa national government aron mahibaw-an kung giunsa sa mga tigpatuman sa balaod pagpalig-on ug pagpatuman sa mga quarantine guidelines. (RAHC/PIA7 Bohol/Analyn Y. Socobos)