TAGBILARAN CITY, July 26 (PIA) -- Giklaro sa Philippine Atmospheric, Geophysical and Astronomical Services Administration (PAGASA) nga dili tinuod ang mga nikatap nga balita sa social media nga may ‘super typhoon’ nga moigo sa nasod nga gihinganlan og ‘Maria.’

Matud pa sa gipagawas nga pahayag sa PAGASA nga gawas sa Typhoon ‘In-Fa’ ug Tropical Storm ‘Nepartak’ nga naa pa sa gawas sa Philippine Area of Responsibility (PAR), wala na sila’y ubang gibantayan nga tropical cyclones nga mosulod sa PAR ug moigo sa kayutaan sa mosunod nga tulo hangtod lima ka adlaw.

Gitumbok sa ahensiya nga base kini sa mga gigunitan nilang impormasyon ug datos.

Gihimo sa PAGASA ang pagklaro aron malikayan ang walay basehan nga kahadlok sa publiko.

Gitambagan sa ahensya ang publiko nga motuo lamang sa mga impormasyon nga naa sa ilang official website, official social media ug video sharing accounts.

Ning bag-o lang, nakaapekto ang bagyong Fabian nga giubanan sa habagat nga nakaingon sa mga pagbaha ug pagguho sa yuta sa pipila ka parte sa Luzon (ECB/PIA7 Bohol)