TAGBILARAN CITY, Bohol, July 27 (PIA) -- Duha sa napulo ug duha ka balaodnon nga buot sa Presidente nga ipalusot sa hiniusang Kongreso, dala sa pagseguro nga dili na mapakuratan pa ang nasud sa pagtapnas sa mga pandemya nga ingon ka kuyaw sa Coronavirus Disease (COVID).

Napulo ug duha ka mga balaodnon ang buot ni Presidente Rodrigo Roa Duterte nga aksyonan sa labing dali  nga panahon sa Kongreso aron matagamtam pa sa katawhan ang dugang kasayon sa pamuhunan ug negosyo aron buhi-on ang ekonomiyang gipalup-og sa pandemya.

Sa iyang ika unom nga State of the Nation Address (SONA) nga iyang gibatbat atubangan sa nagkahiusang Senado ug Ubos Balay Balaoranan, gipadayag ni Presidente Rodrigo Roa Duterte ang Kamugnaan sa Philippine Center for Disease Control and Prevention ug ang Virology Institute of the Philippines.

Kini sa tumong nga makapaugmad na ang nasud og kaugalingong programa sa pagpugong sa pagkatag sa sakit-mananakod ug ang pagtuki sa kalibutan sa virus aron makamugna og tambal niini ang mga Pinoy nga mga siyentipiko.

Ang duha lakip sa napulo ug duha ka mga balaodnon nga buot sa presidente nga ikapagawas sa dili pa siya motapos sa serbisyo isip pangulo sa nasud sa Hunyo 2022.

Ang napulo ug duha, nadugang na usab sa kasamtangan nga mga 17 ka balaodnon nga iya na usab nga gisugyot sa iyang nahaunang mga SONA.

Gihinganlan sa presidente ang 12 ka mga balaodnon nga buot paaksyonan sa Presidente ang:

• Pagpalusot sa hiniusang Sistema sa pagpahawa sa trabaho, pagretiro ug paghatag sa pension sa mga naa sa uniporme
• Libreng tabang legal alang sa kapolisan ug kasundalohan
• Giya sa Pamuhunang Langyaw (Foreign Investments Act)
• Balaod sa Serbisyo Publiko (Public Service Act)
• Retail ug Trade Liberalization Act
• Kamugnaan sa Department for Overseas Filipinos
• E-governance act
• Kamugnaan sa Philippine Center for Disease Control and Prevention
• Kamugnaan sa Virology Institute of the Philippines
• Kamugnaan sa Department of Disaster Resilience
• Balaod nga magmandu sa local nga kagamhanan nga pugos magpahimutang sa mga evacuation centers sa mga lalawigan, syudad, lungsod ug,
• Pagpamoderno sa Bureau of Fire Protection.

Sa mga nalista, may kapin kon kulang pito niini ang gibalik og pasupot sa Presidente, iyang mga sugyot nga gipadayag sa mga nahaunang SONA, lakip na ang Foreign Investments Act, Public Service Act, Retail ug Trade Liberalization Act, Department of Overseas Filipinos, E-Governance Act, Department of Disaster Resilience, ug ang Modernisasyon sa kabomberohan. 

Segun sa mga tigpaniid, swerte na nga mapasupot ang katunga niining mga balaodnon, sanglit ang mga magbabalaod may kubos sa usa ka tuig na lamang pagtutok niini.

Tungod sa nasundong piniliay sa sunod tuig, mangandam na usab ang mga magbabalaod sa Senado ug Ubos Balay balaoranan lakip na ang mga representante sa mga partylists alang sa kampanya nga magsugod sa unang kwarter sa 2022. (RAHC/PIA7 Bohol)