CORTES, Bohol, July 26 (PIA) -- Uban sa suporta sa mga local nga kagamhanan, misalig si Presidente Rodrigo Roa Duterte nga magpadayon pagkagabok ang suporta nga nakuha sa komunista nga kalihokan, sa sunod nga mga buwan.

Ug sama sa pila ka katuigan nga pag-alsa sa mga kamusliman sa Mindanao, mapatunhay na ang kalinaw kon mapaundang na ang armadong pakigbisug sa mga komunista sa dili madugay.

Kining bukas nga pangindahay, gibatbat sa Presidente atul sa iyang ika unom nga State of The Nation Address (SONA) nga gitambongan sa hinusang Kongreso sa Senado ug Ubos Balay Balaoranan, didto sa Batasan, Julyo 26.  

Kahinumduman nga sa iyang pagsugod og gunit sa timon sa kagamhanan, daan na nga nagkabaguod ang nasud sa suliran sa komunismo nga pag-alsa, sa mga katilingban nga gisiak sa tinuohan, ug sa suliran sa illegal nga drugas ug kriminalidad.

Niini, sa nagkatag nga insurhensya ug sa kakuwang sa kapasidad sa military nga mosagubang sa hulga sa sulod ug gawas sa nasud, ug samtang ang kapolisan nagkapuliki sa pagbuntog sa kriminalidad ug illegal nga drugas, gipalig-on sa kamanduan ni Pres Duterte ang institusyon sa Armadong Kusog sa Nasud ug sa Kapolisan  ug ubang sanga sa armading serbisyo sa nasud pinaagi sa programa sa pagpamoderno sa mga kagamitan ug institusyon niini.

“Atong gipalig-on ang institusyon ug gipataas ang morale sa kasundalohan, kapolisan ug mga kaubanan sa uniformed service,” matud ni Pres Duterte, kinsa mapasalamaton usab sa Kongreso sa paghatag og suporta niini.

Gipalig-on na sa nasud ang kapasidad niini sa depensa aron makabarug kini sa pagpanalipod sa iyang teritoryo gikan sa mga kaaway sa sulod ug gawas.

“Ato  nga gi-welcome ang duha ka mga barko sa nasud nga may kapasidad nga magpalusad og missiles aron makapanalipod kita sa atong kadagatan,” saysay sa Presidente.

Gawas nga napagawas na ang gipataas nga suholan sa mga sundalo ug pulis, gipangayo sa Presidente ang Hiniusang Sistema sa paghatag og pabawon, retirement ug pension sa mga naa sa unipormadong serbisyo.

Dugang pa, usa ka balaodnon alang sa libre nga tabang legal sa kasundalohan ug kapulisan aron may manalipod kanila kon makasuhan sa ilang paghimo sa mga opisyal nga buhat.

Samtang malampuson na ang ang kagamhanan sa pagpanalipod niini sa mga hulga sa mga democratic institutions niini, gibutyag ni Pres Duterte nga ang kalinaw ug seguridad dili lamang suliran sa kasundalohan.

Uban sa  pag-umol sa National Task Force to End [Local] Communist Armed Conflict o NTF-ELCAC, nahimo sa nasud ang pag-larut sa gamut sa kagubot nga nagpanghadlok sa mga komunidad sa kapid-an na ka tuig.

Dinhi nasulod ang kritikal nga suporta sa LGUS sa nagpadayon nga paningkamot sa pagpanday sa luwas ug mosagubang sa panagbangi nga mga komunidad, pinaagi sa pagpahiuli ug pag-ugmad sa mga komunidad nga gilumloman sa mga rebelde.

“Pinaagi sa NTF-ELCAC, atong gipundohan ang mga kadalanan, eskwelahan, patubig, kasanihan ug kahimsog, ug mga kapanginabuhi-an,” matud sa kanhi mayor sa Davao.

“Dinhi, kapin sa 17 ka libo na ka mga rebelde ang mitahan og balik sa kagamhanan ug nakasinati na sa Enhanced Community Local Integration Program,” taho niya.

Dinhi usab, gipasidunggan sa Presidente ang kapolisan ug kasundalohan sa pagpugday sa 15 ka mga communist fronts sa Communist Party of the Philippines. (RAHC/PIA7 Bohol)