TAGBILARAN CITY, Bohol, Aug. 3 (PIA) -- Nagkanihit na ang kadaghanon sa mga luna sa mga tambalanan sa Bohol, ilabi na niadtong mga pasilidad nga may kapasidad sa pag-atiman sa coronavirus disease (COVID-19).
Segun sa kasayuran nga makit-an sa Bohol Inter Agency Task Force (BIATF) Emergency Operations Center sa COVID-19 dinhi, sa bugtong tertiary hospital nga mao ang Gov Celestino Gallares Memorial Hospital sa Tagbilaran, sa Agosto 3, tulo na lang ka luna nga kahigdaan ang bakante sa COVID Intensive Care Unit (COVID ICU), upat na lang ang luna sa COVID ward, 17 ka luna alang sa COVID Isolation beds ug tulo na lang ka COVID mechanical ventilator ang bakante.
Okupado na ang 11 sa 14 ka luna sa COVID ICU, 31 sa 34 ka katre sa COVID ward, ug ang 17 sa 34 ka katre sa isolation beds samtang 11 sa 14 ka ventilator machines ang gigamit nan a nahisgutang tambalanan.
Sa Secondary Hospitals dinhi, sa ACE Hospital, duha na lang ka bakante sa COVID ICU, walay COVID ward, pito ang bakante sa 32 ka katre sa isolation beds ug gigamit na ang upat ka mechanical ventilator machines didto.
Sa Ramiro Community Hospital, puno na ang upat ka COVID ICU beds, wala nay COVID ward nga bakante ug usa na lay bakante sa 17 ka COVID Isolation beds samtang bakante ang usa sa 2 nila ka COVID ventilator machines.
Sa Tagbilaran Community Hospital, wala silay COVID-ICU, walay COVID ward apan may siyam ka bakante sa 11 ka COVID Isolation beds ug bakante ang usa sa duha ka mechanical ventilators niini.
Sa Holy Name University Hospital, wala silay COVID ICU, walay COVID ward samtang bakante pa ang pito sa siyam ka COVID isolation beds ug usa sa duha ka mechanical ventilators.
Sa Primary Hospital facilities sa Bohol, duha ka COVID isolation beds ang bakante sa Borja Hospital samtang upat ang ilang COVID wards nga bakante.
Sa Catigbian District Hospital, duha ang bakante sa 8 ka COVID Isolation beds ug wala silay COVID ward.
Sa Simeon Toribio Memorial Hospital sa Carmen, unom sa 12 nila ka isolation beds ang bakante, wala silay COVID ward.
Sa Don Emilio del Valle Hospital sa Ubay, pito sa ilang 24 ka hospital isolation beds and bakante, puno na ang ilang 23 ka COVID wards.
Sa Dra Lim Clinic sa Valencia, puno naang diha ka isolation beds ug bakante hinuon ang tulo nila ka COVID ward.
Sa Garcia Memorial Provincial Hospital sa Talibon, 2 sa 13 ka COVID Isolation beds ang bakante, walay COVID wards.
Sa Teodoro Galagar Hospital sa Jagna, pito pa sa 8 ka isolation beds ang bakante samtang wala silay COVID wards.
Sa Coop Hospital sa Tagbilaran, bakante ang lima sa napulo nil aka COVID wards, samtang bakante usab ang unom ka COVID wards sa Tagbilaran Maternity ug Puericulture Clinic. (RAHC/PIA7 Bohol)
