CORTES, Bohol, Aug. 5 (PIA) -- Bisan pa man kon gisuspenso sa Bohol ang pagpasulod sa mga tawo sugod Agosto 6 ngadto sa 20, makasulod pa gihapon ang unom ka matang sa mga tawo, nga gilugwayan sa Executive Order 37 series of 2021, ug makabyahe paingon sa Bohol.

Sa labing bag-ong mandu nga gilagdaan ni Gob Arthur Yap Agosto 2, bisag sa border closure nga gimandu sa Executive Order 37, series of 2021, makasulod pa gihapon  kon may ikapakita nga mga gikinahanglang dokumento ang mga health workers nga may opisyal nga gimbuhaton ug mga opisyal sa kagamhanan nga gitugotan sa pagbyahe.

Gitugotan usab sa E.O. 37 ang pagbyahe niadtong nanginahanglan matambalan ug maatiman sa mga ospital ug nagbyahe alang sa humanitarian reasons, kadtong nagtrabaho aron pagpadayon sa batakang serbisyo sama sa pagpatunhay sa serbisyo sa koryente ug tubig.

Makatabok usab nganhi sa Bohol, bisan sa pagsira sa mga utlanan, ang mga empleyado sa bangko nga natahasan sa pagdugang sa pundo nga salapi ug mga kagamitan aron mapatunhay ang serbisyo sa mga bangko.

Gawas aa mga nahisgutan, makasulod pa usab kadtong nga nanguli nga mga trabahante gikan sa gawas sa nasud (Returning OFWs).

Hinuon, silang mga natugotan nga makasulod sa Bohol, kinahanglang makapakita sa tukmang mga papeles nga makapamatuod sa ilang mga tuyo sa pagsulod sa Bohol.

Kinahanglan pa gihapon nila nga makapakita nga sila walay dala nga kagaw nga gipamatuod sa negatibo nga resulta sa COVID test pinaagi sa Reverse Transcription Polymerase Chain Reaction (RT-PCR) ug saliva PCR nga gikuha pinaagi sa swab, 72 oras sa dili pa mobyahe.

Pag-abut sa Bohol, kining nahisgutang mga tawo, moderetso sa ilang mga pasilidad sa pagkwarantina sama sa Temporary Treatment ug Monitoring Facility (TMMF) sa LGU o sa kwarantinahang hotel nga gitogutan sa Department of Tourism, ug ngadto lamang sa mga lugar nga naapil sa ilang opisyal nga mga tuyo samtang likayan nila ang pagduol sa mga tawo, hangtud nga sila mopauli ug mogawas sa Bohol.

Kon kining mga tawhana mopuyo sa Bohol sa sobra sa 5 ka adlaw, kinahanglang sila mopailawom sa RT PCR pag-usob sa ikalima nila ka adlaw dinhi, ug did-an nga makagawas sa quarantine facility hangtud nga makapakita sila nga negatibo sila sa COVID pinaagi sa resulta sa ilang labing bag-o nga COVID test.

Anha lamang sila makagawas sa ilang kwarantina kon may negatibo na sila nga resulta sa COVID, ug kini sinugdanan sa ilang pagtugot nga makatipo sa ilang banay ug makasuroy sa bisan diin mang bahin sa lalawigan. (RAHC/PIA7 Bohol)