TAGBILARAN CITY, Bohol, Aug. 6 (PIA) -- Nagkinahanglan nga dili moabut sa 37.5 ang body temperature sa usa ka tawo, local man o bisita nga gikan sa laing dapit nga mosulod sa tulo ka entry control points sa Panglao sugod Agosto 6 hangtud sa Agosto 20.
Kini maoy unod sa Executive Order No. 20 series of 2021 nga gipagawas ni Mayor Leonila Montero sa Panglao, niadtong Agosto 4.
Matud sa E.O. 20 sa Panglao, pugos na ang pagkuha sa kainiton sa lawas o body temperature sa tanang tawo nga mosulod sa lungsod subay sa tulo niini ka dagkong entrada: sa mga nasudnong dalan sa Tangnan, Lourdes ug Libaong.
Gawas nga kini nakighiusa sa nasudnong ug local nga mga kagamhanan dinhi sa pagpugong sa mas lapad nga pagkatag sa coronavirus disease, (COVID-19), ang mandu maoy dyutay nga tampo sa lungsod sa pagpugong sa pagsulod sa gikahadlokan nga Delta variant sa COVID-19.
Segun sa sa Department of Health, sa University of the Philippines-Philippine Genome Center (UP-PGC), ug sa University of the Philippine National Institute for Health, namatikdan na sa ilang surveillance ang presensya sa B1.1.7 (Alpha), B1.351 (Beta), ug P.1 (Gama) nga matang o variant sa Severe Acute Respiratory Syndrome (SARS CoV) dinhi sa Pilipinas.
Gikompirmar usab sa tulo ka mga sentro sa research dinhi sa nasud ang presensya sa B.617 (Delta) variant, nga una na nga nataho nga maoy kinaingnan sa kanit ug kalit nga pagpanakod sa sakit ngadto sa ilang mga kamatayon sa mga tawo sa India.
Sa pagpaneguro nga walay ingon niining matang sa sakit nga makasulod sa lungsod ug makasugod sa pagpanakod, gimandu ni mayor Montero, pinaagi sa E.O., ang pugos nga pagkuha sa body temperature pinaagi sa thermal scanning sa tanang mosulod sa Panglao.
Gimandu usab sa EO ngadto sa tanang mga trabahante ug residente sa panglao, mga bisita ug kadtong msulod sa lungsod sa paghapit sa mga checkpoints sa Tangnan sa Dauis-Panglao via Bingag Road), sa Lourdes sa Dauis-Panglao via Central Line ug sa Libaong sa Dauis-Panglao via Mayacabac Road.
Ipabarug dinhi sa mga nahisgutang lugar ang Quarantine Control Points (QCP) diin may mga tinugyanan sa lungsod nga maghimo sa thermal scanning sa tanang mosulod sa lungsod.
Kadtong masakpan nga may kainiton ang lawas sa 37.5 degrees, dili na tugotan pa nga makalabang sa QCP, matud sa E.O.
Ang COVID, lakip na ang delta variant niini, kasagran mopakita sa simtomas nga hilanat nga ang temperatura naa sa 37.5 pataas ug ubo, sip-on, panalit sa lawas ug kalisud sa pagginhawa.
Tungod niini, gipaabut nga may pagkalangan gayud sa mga byahe pasulod sa lungsod, mao nga gitambahan ang mosulod sa Panglao sa paglakaw og sayo aron dili mauwahi sa unsa may tuyo ditto sa lungsod. (RAHC/PIA7 Bohol)
