TAGBILARAN CITY, Aug. 11 (PIA) -- Nipasidaan sa publiko ang Department of Transportation (DOTr) batok sa mga online fixer.

Nipagawas og pahayag ang Land Transportation Office (LTO) nga walay kalabotan ang ahensya sa Facebook account nilang Matot Zara, Ronald Canadilla, ug Dynnie Loraine.

Matud pa sa gipagawas nga pahayag sa ahensya, nagtanyag ang maong mga indibidwal og pekeng driver’s license sa mga aplikante online.

Nipahinumdom ang LTO nga likayan ang maong mga FB account tungod kay gawas nga ilegal kini, dili usab lehitimo ang maong transaksyon.

Gipa-amping usab ang mga aplikante sa mga indibidwal nga nagtanyag og tabang gawas sa mga opisina.

Matud pa sa ahensya nga dili usab kini awtorisado ug konektado sa LTO.

Pasidaan pa sa ahensya, dako ang ipahamtang nga silot sa bisan kinsang masakpan nga naggunit og pekeng lisensya.

Nanawagan ang LTO sa publiko nga i-mass report ang mga nahisgotang Facebook account aron mahunong na ang ilang mga ilegal nga aktibidad. (ECB/PIA7 Bohol)