PAGADIAN CITY, August 16 (PIA)—Gipahigayon sa Provincial Social Welfare and Development Office (PSWDO) ang blessing ceremony sa bag-ong natukod nga Provincial Crisis Center for Women and Children (PCCWC) sa Provincial Capitol Complex, Dao, Pagadian City ning bag-ohay pa lang.
Sa mensahe ni Governor Victor Yu, iyang gidayeg ang PSWDO sa paghatag ug dakong pagpakabana sa mga kababayen-an ug kabataan nga biktima sa mga pag-abuso pinaagi pagtukod sa duha ka andana nga PCCWC building.
Matud pa ni Yu nga responsibilidad sa kagamhanan ang paghatag ug serbisyo ning maong sektor sa katilingban.
"Wala’y labing dako nga kalipay sa kinabuhi sa tawo nga dili mapalit ug kwarta kung dili kana gyud nga motabang sa atong katawhan ilabi na panahon sa malisod nga kahimtang o sa krisis", dugang pahayag ni Yu.
Gidasig usab sa gobernador ang PSWDO nga mamahimong proactive pinaagi sa pagpahigayon ug programa sa radyo aron mahibalo ang mga kababayen-an ug kabataan sa gipatuman nga programa ug serbisyo sa kagamhanan sa lalawigan.
Samtang gipahayag usab ni Kongresista Divina Grace Yu sa unang distrito nga pinaagi sa maong PCCWC building, malaumon ang mga kababayen-an ug kabataan nga nabiktima sa pagpang-abuso nga aduna silay balay nga kaadtoan ug kadangpan. (NBE/GCC/PIA-Zamboanga del Sur)
