PAGADIAN CITY, August 18 (PIA)— “Katungdanan sa Presidential Communication Operations Office  (PCOO) nga mohatag sa publiko dili lamang ang mga kasayuran apan lakip na ang mga nahimo sa Presidente.”

Kini maoy gipahahibalo ni Secretary Martin Andanar sa interview sa RMN DXDR radio station dakbayan sa Dipolog ning adlaw’ng Miyekoles.

Matud pa ni PCOO Secretary Martin Andanar nga ang ‘Duterte Legacy’ usa  ka  communications campaign sa atong gobyerno aron mapasabot sa mga tawo kung unsa ang mga kabilin ni Presidente Duterte sa iyang unom ka tuig nga pagpangatungdanan isip pangulo sa atong nasud.

Gihan-ay ni Andanar pagpahibalo ang mga mahinungdanon nga proyekto nga napatuman ilawom sa Duterte administration sama ning mosunod: Freedom of Information Bill, Pagmugna sa Presidential Task Force on Media Security, Build, Build, Build Program, paghimo sa Free Irrigation Act, Free Tuition Act, pagkumpleto sa 150,000 classroom, pagtukod sa Malasakit Center, ug daghan pang uban.

Matud pa ni Andanar nga ang mga mahinungdanong proyekto napatuman tungod sa lig-on nga ‘political will’ sa presidente.

“Ang Duterte Legacy mao kini ang usa ka polisiya sa matag-presidente nga magpahibalo sa katawhan nga aduna silay kabilin sa pagtapos sa ilang termino, panapos nga pahayag ni Andanar. (EDT/GCC/PIA-Zamboanga del Sur)