PAGADIAN CITY, August 19 (PIA)— Gimando ni Ruth Fuentes, ang Regional Director sa Department of Education (DepEd-IX) sa tanang mga magtutudlo sa Zamboanga del Sur Schools’ Division nga magpabakuna batok sa COVID-19.

Sa gipahigayon nga panagtigum sa mga division chiefs ning bag-o pa lang, gipahibalo ni Fuentes nga sa vaccination program sa kagamhanan, ang DepEd-9 nakatala sa labing ubos nga rating sa vaccination.

Nasayran usab ni Fuentes nga ang Zamboanga del Sur Schools’ Division adunay lamang 51% nga mga magtutudlo ang nabakunahan batok sa COVID-19.

Samtang, gipahibalo sa mga division chiefs nga ang COVID-19 vaccination roll out ang hinay sa mga lungsod tungod kay gihatagan ug priority sa mga local government units ang mga grupo nga  A2 ug A3 ug dili makapadayon ug bakuna sa A4 kinsa nahisakop ang mga magtutudlo kung dili mahuman ug bakuna ang nasangpit nga priority groups.

Gimando ni Fuentes nga ipalig-on ang advocacy program sa pagbakuna sa COVID-19 tungod kay ubos ang turn out sa region 9.

“Ayaw kamo pagsalig sa usa ka source, himoa ninyo ang tanang pamaagi nga kamo mabakunahan. Hinumdumi nga kita ang nagtrabaho sa nasudnong kagamhanan,” si Fuentes nagkanayon kinsa hingpit na nga nabakunahan.

Gihatagan ni Fuentes ug deadline ang 49% nga mga magtutudlo nga wala mabakunahan nga hangtud karong semanaha makumpleto ang ilang pagbakuna. (EDT/GCC/PIA-Zamboanga del Sur)