MALAYBALAY CITY (PIA)—Nagpalit bag-ohay lang ang local government unit (LGU) sa Malaybalay og usa ka ultra-cold freezer aron ‘safety’ ang mga bakuna sa COVID-19 nga mo-abot sa syudad gikan sa national government.
"Kini aron maseguro nga ang pag-handle sa mga bakuna makasubay sa gitakda nga temperature aron magpabilin ang ka epektibo niini,” ingon ni Mayor Florencio T. Flores Jr.
Gipasabot niya nga ang bag-ong napalit nga ekipo nagkantidad og P680,000. Usa kini ka Ultra-low temperature (ULT) nga freezer nga makahimo sa pagtipig sa mga bakuna sa temperatura nga “negative 70 degrees Celsius (-70 °C).”
Hugot ang pagsuporta ni Flores sa mga programa alang sa pagtubag sa krisis nga dala sa COVID-19, samtang giawhag usab niya ang publiko nga suportahan ang kampanya sa pagbakuna.
Base sa pinaka-ulahahing datos sa syudad, naay 38,850 ka mga tawo ang nabakunahan. Sa kinatibuk-an niini, 24,065 ang nakadawat sa ilang una nga dosis ug 14,785 ang nakumpleto ang ilang duha ka dosis. Tanan sila mga myembro sa prayoridad nga grupo nga gilangkuban sa A1 (healthcare workers), A2 (mga senior citizen), A3 (mga adunay comorbidities), ug A4 (essential workers).
"Aduna na kitay kapasidad sa pagtipig sa Pfizer o uban pang mga bakuna nga nagkinahanglan sa ubos nga temperatura aron mamintinar ang pagka-epektibo niini. Ang mga bakuna sa Pfizer-BioNTech nanginahanglan sa labing ubos nga temperatura hangtod sa -70 °C,” matud ni Sangalang. (BGE/PIA-Bukidnon)
