TAGBILARAN CITY, Bohol, Aug. 20 (PIA) -- Gi-anunsyo sa kagamhanang probinsyal sa Bohol nga ang mga Bol-anong mangule sa lalawigan, mahimong mopahimos sa discounted fee sa RT-PCR testing agi og tabang sa mga manguleng residente ug Boholano overseas Filipino workers (OFWs).

“Good news! For Boholanos coming home to Bohol, you may avail of the discounted fee of RT-PCR testing (Maayong Balita alang sa mga Bol-anon nga manguli, mahimo na kamo maka-avail sa mas barato nga bayronon sa RT-PCR testing)," matud pa sa gi-post nga anunsyo sa Provincial Government of Bohol Facebook niadtong Agosto 20.

Ang kaniadtong nagkantidad og P3,500 sa New World Diagnostics (NWD), nagkantidad nalang karon og P1800.00 alang sa mga Bol-anon.

Matud pa nga ang mga Bol-anon nga magbyahe sulod sa Pilipinas o sa gawas sa nasud mahimong makapahimos sa discounted rate.

Kinahanglan lamang e-presentar ang valid ID ug airplane ticket paingon sa Bohol (alang sa tanang pasahero padung sa Bohol); valid ID nga may proof of Bohol residence (Boholanos nga nagkinahanglan og RT-PCR test); valid ID nga may proof of Bohol residence ug airplane ticket (Boholanos alang sa domestic ug international travel).

Kahinumdoman nga ang mga nagbyahe mireklamo sa mahal nga bayad sa RT-PCR test.

Sa pagkakaron, gitakda ang price cap sa RT-PCR test sa P5,000 sa mga pribadong laboratoryo samtang P3,800 sa mga pampublikong laboratoryo. (ECB/PIA7 Bohol)