TAGBILARAN CITY, Bohol, Aug. 24 (PIA) -- Kinatibuk-ang katloan ug tulo (35) sa matag usa  ka gatus ka swab samples nga gipaagi sa Reverse Transcription Polymerase Chain Reaction (RT-PCR) molecular laboratory sa Bohol ang milugwa nga positibo ang resulta sa coronavirus disease (COVID).

Kini maoy migawas nga kasayuran diha nga gipaambit sa Bohol Inter-agency Task Force (BIATF) ang datus sa usa lamang ka adlaw, Agosto 23, 2021.

Sa nahisguan nga adlaw, may tinatibuk-ang 157 ka bag-ong nataho nga kaso gikan sa duha ka mga molecular laboratories sa Bohol.

Segun sa taho sa BIATF, sa 157 ka mga bag-ong nagpositibo sa sakit, 151 niini ang nagagikan sa Gov Gelestino Gallares Memorial Hospital (GCGMH) molecular laboratory ug 6 lamang ang gikan sa Bohol Cointainerized Molecular Laboratory diin mahimutang ang RT PCR niini.

Ang 151 nga nagpositibo sa COVID-19 nga napagawas sa GCGMH molecular laboratory, napagawas sa duha  ka hugna o batches sa testing.

Sa una nga batch, sa 169 ka mga swab samples gikan sa mga pasyente nga gidudahang may COVID-19, 46 lamang ang migawas nga nag positibo sa kagaw.

Niini, nag-average sa 27.21% ang positivity rate sa kinatibuk-ang mga samples kon itandi sa nagpositibo niining hahisgutang sakit.

Sa ika duha nga batch, sa 273 ka swab samples, 105 usab ang migawas nga nagpositibo.    

Nag-average usab ang ikaduha nga batch sa 38.46% ang positivity rating.

Sa laing bahin, gikan sa 15 ka mga swab samples nga gipaagi sa Bohol containerized molecular laboratory diin mahimutang ang RT PCR, 6 lamang ang nagpositibo sa sakit.

Kini katumbas sa average nga 40% nga positivity rate.

Kon sumadahon ang tulo ka mga positivity rating sa tulo ka mga batches aron makuha ang average, mogawas nga ang positivity rate sa Bohol sa Agosto 23, anaa sa 35.04%, o 35 sa matag us aka gatus ka swab samples.

Sa susamang adlaw, milapas na usab sa sua ka libo ang aktibong kaso sa Bohol.

Kahinumduman nga mingkanaug na unta sa us aka libo ang kaso sa mga aktibong COVID-19 human mingsapong sa us aka libo niadtong Hunyo 12, apan mikanaug kini sa us aka buwan ang milabay.

Niadtong ikatulong semana sa Hulyo, napaubos ang kaso sa COVID sa Bohol, butang nga namintirnar hangtud niadtong Agosto 22.

Miabut sa 1,164 ang aktibo nga kaso sa COVID-19 niadtong Agosto 22 ug misaka pa ngadto sa 1,214 ang aktibong kaso Agosto 23.

Ang namatay sa nahisgutang sakit, miabut na sa 254 segun sa BIATF sa taho niini Agosto 23 samay alas 8:00 sa buntag. (RAHC/PIA7 Bohol)