TAGBILARAN CITY, Bohol, Aug. 23 (PIA) -- Ang Department of Social Welfare and Development (DSWD) pinaagi ni Assistant Secretary for Visayas Affairs Victor Juan Neri ug Field Office 7 Regional Director Rebecca P. Geamala ning bag-o lang nang-apod-apod og Assistance to Individuals in Crisis Situation (AICS) ngadto sa pipila ka ‘vulnerable sectors’ sa Bohol.

Kinatibuk-ang kantidad sa P17,763,000 ang nahatag sa DSWD Field Office 7 pinaagi sa programa niining AICS ngadto sa 5,921 indigent beneficiaries nga nakadawat og P3,000 matag usa ning buwan sa Agosto 2021.

Ang uban sa mga ‘vulnerable sectors’ nga nakadawat og tabang pinansyal naglakip sa mga market vendors sa syudad sa Tagbilaran ug Persons with Disabilities (PWD) gikan sa mga lungsod sa Maribojoc, Loon, Baclayon, Loboc ug Catigbian.

Gawas sa mga PWDs, displaced workers, solo parents, indigent families ug indibidwal gikan sa mga munisipalidad sa Calape, Antequera, Batuan, Duero, Anda, Dauis, Danao ug Sikatuna ang nakadawat usab og tabang pinansyal.

May mga biktima usab sa bag-o lang Tropical Storm Dante gikan sa mga lungsod sa Candijay ug Loay ug displaced workers sa sektor sa turismo nga grabeng naapektuhan sa lockdown ang nakadawat usab og assistance.

Si Liliosa Alcala, usa  ka senior citizen gikan sa barangay La Salinas, lungsod sa Loay mapasalamaton og daku sa DSWD tungod sa tabang pinansyal nga nadawat.

“Gamiton ni nako para palit pagkaon ug tambal,” matud pa ni Alcala.

Ang AICS parte sa protective services sa DSWD alang sa mga kabos, marginalized ug vulnerable/disadvantaged nga mga indibidwal. (ECB/PIA7 Bohol)