KALIBO, Aklan (PIA) -- Ginpatigayon it Aklan Public Employment Service Office (PESO) ro pag implementar it Special Program for the Employment of Students (SPES) iya sa probinsya sa dag-on ngara.
Suno kay Vivian R. Solano, Aklan PESO Manager, may 34 nga mga benefisyaryo it programa sa makaron nga dag-on kon siin 10 kanda ro maga trabaho sa sueod it 30 diyas bilang SPES Babies ukon repeaters nga nakasueod eon sa programa nga ku nagtaliwan nga mga dinag-on, samtang ro 24 hay maga trabaho bilang regular nga benefisyaryo ukon rato nga imaw pa eang naka entra sa programa ngara.
Antes mag trabaho, ro mga estudyante ngara hay nagtambong sa oryentasyon sa daywang (2) ka batch sa Provincial Trade Hall, Provincial Capitol Grounds, Kalibo, sa pagpanguna ni Solano, kaibahan ro Provincial Director it Department of Labor and Employment (DOLE) nga si Joselito Dela Banda ag SPES Focal Person nga si Joeuella Faiganan.
Ginsugid ni Solano nga ro pagtrabaho it mga estudyante ngara hay nag-umpisa ku Hulyo 19 ag magatapos sa Agusto 31, 2021.
Ginpasilitar man it PESO ro pagpanupod it mga ID it mga benefisyaryo ngara ag ro endorsement letters sa andang mga Punong Barangay kon siin nag-umpisa eon sanda it pag adto tatlong (3) beses kada dominggo halin it Hulyo 19.
Samtang, kurundaya man, ro PESO-Aklan hay nagpasilitar man sa bueanan nga pagbisita it Overseas Workers Welfare Administration (OWWA) Region 6 sa probinsya sa pag representar ni Sherwyn M. Madayag, Family Welfare Officer ku Hulyo.
Si Madayag, kaibahan si Solano, hay nagpanupod it mga tseke nga mgay kabilugan nga P865,000.00 sa mga benefisyaryo it OWWA sa Aklan sa idaeum it sari-saring mga programa ag serbisyo.
Sa 43 nga mga benefisyaryo nga nag-abot sa pagbuoe ku andang mga tseke, 37 ro para sa Balik Pinas, Balik Hanapbuhay Program (BPBH); 1 para sa Education Livelihood Assistance Program (ELAP); 1 para sa Project Educational Assistance through Scholarship in Emergencies (EASE); 1 para sa Project Alalay sa Pag-aaral (PAP); 1 para sa Death Assistance/Burial; ag 2 para sa Welfare Assitance Program (WAP) Medical Assistance. (AAL/VGV/PIA6 Aklan)
