TAGBILARAN CITY, Bohol, Sept. 1 (PIA) -- Sa panahon nga mahimong magpaluag ang mga local nga opisyales sa kalungsuran sa pagpatuman sa lagda pagbatok sa coronavirus disease (COVID-19) tungod sa kahadlok nga maapektohan ang ilang mga boto sa umaabut nga piliay, gimandu ni Gob. Arthur Yap ang way paglugak nga pagpatuman sa protocols.
Kini makit-an sa pagpagawas sa Executive Order No 42 series of 2021, nga nagbukas na sa usa na ka buwan nga pagpugong sa mga barko ug eroplano nga makahatud og mga pasahero nga posibleng maoy sakyan sa sakit nga mananakod, dinhi sa Bohol.
Kini taliwala usab sa tataw nga padumuli pa sa daghang mga tawo nga tumanon ang mga lakang paglikay sa COVID-19.
Didto sa milabay nga hiniusang tigum sa Provincial Peace and Order Council, Anti Drug Abuse Council ug Task Force Ending Local Communist Armed Conflict, gitaho sa kapolisan sa Bohol nga mingkabat sa 38,127 ka mga pagsupak sa mga lagda ang natala segun usab sa mga gipahiluna nga mga lakang paglikay sa COVID-19.
Matud ni Police Major Norman Nuez, sa pagpatuman lamang sa social distancing, miabut na sa 14,980 ka mga pagsupak ang natala sa hiniusang ihap sa kapolisan sulod sa 420 ka mga adlaw.
Ang social distancing, kon abagan pa sa pagsul-ob og face mask, makapanalipod na sa pagtakod sanglit kini nga usa ka metros nga distansya sa matag usa, dili na maabut sa pagtakboy sa kagaw nga mosakay sa laway sa tawo.
Sa pagsul-ob usab og facemask, subay sa Executive Order No, 15, series of 2020 nga giluwatan ni Gob Yap, miabut sa 12,420 ang nadakpang nga nakalapas niini, segun pa ni Maj Nuez.
Si Maj Nuez, kinsa maoy Operations Officer sa Campo Dagohoy, mipadayag usab nga sa pagpatuman sa mga tinugyanan sa social distancing sa mga sakyanan segun sa mga Guidelines nga gipagawas sa Department fo Transportation (DOTr), miabut sa 4,467 ang nadakpan kay naghuot na sa mga sakyanan sukwahi sa gilagda nga 50% lamang una ang makasakay.
Gawas pa niana, miabut sa 240 ang nadakpan nga misakay sa mga pangpasaherong sakyanan o mingsulod sa mga pangpublikong lugar sama sa malls nga wala magsul-ob sa dugang panalipod sa face shield.
Sa kalapasan sa Executive Order No 12, o kabahin sa curfew nga gihabol sa tibuok Bohol gikan sa alas 9:00 ngadto sa alas 5:00 sa saying buntag, 2,739 ang nasakpan nga naglatagaw pa bisan may mandu sa pagpuyo sa balay.
Sa E.O. No 16 kabahin sa 24 oras nga curfew sa mga 18 anyos paubos o mga menor de edad, miabut sa 1971 ang mga kabataan nga nadakpang misupak niini, samtang sa mga 65 anyo pataas, kinsa usab gipailawom sa susamang curfew, 233 ka edaran ang nadakpan.
Sa mga nakalapas sa liquor ban sa EO No. 17, series of 2020, miabut sa 1,077 ang nasakpan ug naaktohan nga nagtagay sa mga pangpublikong lugar, o nagpasagol sa laing tawo sa ilang pagtagay sa pribadong lugar.
Sa nagkadaghan nga natakdan na sa sakit ug sa kakuyaw nga dala sa laing upat na usab ka kaso sa Delta variant nga nia dinhi, gipaneguro sa gobernador nga ipatuman gayud sa estriktong paagi ang mga lagda aron makatampo sa pagpakunhod sa mga aktibong kaso. (RAHC/PIA-7/Bohol)
