MANILA, October 13 (PIA) -- Kinahanglang hatagan og oportunidad nga magnegosyo ug magbaton og panginabuhian ang mga transport workers ilabi na karong may pandemya, matud pa ni Department of Transportation (DOTr) Kalihim Arthur Tugade.
Kini ang gitumbok ni Tugade sa gilagdaang kasabotan tali sa DOTr, Department of Labor and Employment (DOLE), Land Transportation Franchising and Regulatory Board (LTFRB), ug sa Office of Transportation Cooperatives (OTC) niadtong Oktubre 12, 2021, diin ang dugang nga kahibalo sa negosyo mao ang mahimong yawi sa pagbag-o sa panginabuhian sa mga PUV drivers, operators ug uban pang transport workers.
“Nakapakalaking bagay para sa mga naghahanap-buhay sa pampublikong sasakyan na magkaroon ng karagdagang kaalaman upang mapabuti ang kanilang serbisyo, o ‘di kaya ay magkaroon sila ng kakayahan sa pagnenegosyo at para sa iba pang pagkakakitaan para makabangon sa gitna ng pandemya,” matud pa ni Tugade atol sa “enTSUPERneur” Memorandum of Agreement (MOA) signing ceremony.
Matud pa sa Kalihim nga ang enTSUPERneur program usa ka maayong oportunidad diin ang mga transport workers nga apektado sa PUV Modernization Program ug COVID-19 pandemic magbaton og kita samtang sila gibansay sa ubang skillset sama sa pagbukas og sari-sari store, pagnegosyo sa pagkaon ug pagmekaniko.
Samtang matud pa usab si DOLE Kalihim Silvestre Bello III nga pinaagi sa “enTSUPERneur” mahimong magbaton og alternatibong panginabuhian aron madugangan ang kita ilabi na karong may pandemya.
Ang MOA agi og pagsunod sa implementasyon sa DOLE Integrated Livelihood Program (DILP) alang sa mga driver ug operator sa mga pampublikong transportasyon nga apektado sa PUV Modernization Program isip resulta sa Local Public Transport Route Planning ug sa Route Rationalization.
Base sa kasabotan, ang LTFRB ug OTC maoy moila sa mga benepisyaryong drayber, konduktor, dispatcher, mekaniko, ug uban pang transport employees—miyembro man o dili sa kwalipikadong kooperatiba.
Nakalatid usab sa kasabotan nga makadawat ang matag benepisyaryo og P30,000 nga kantidad sa tabang pinansyal. (ECB/PIA7 Bohol)
