TAGBILARAN CITY, Bohol, Oct. 20 (PIA) -- Gipaubos sa nasudnong kagamhanan ang lalawigan sa Bohol sa alert level 2 gikan Oktubre 20 hangtod 31.
Gi-anunsyo ni Presidential Spokesman Harry Roque niadtong Martes, Oktubre 19 nga ang alert level system gigamit human ma-obserbahan ang pagkunhod sa gidaghanon sa mga inadlaw nga bag-ong kaso sa COVID-19 ug pagsaka sa vaccination rates.
Gawas sa Bohol, ang ubang mga lugar nga gipaubos sa alert level 2 naglakip sa Batangas, Quezon province, Lucena City, Cebu City, Lapu-Lapu City, Mandaue City, Cebu province, Davao de Oro, Davao del Sur, ug Davao Oriental.
Gipaubos usab sa level 3 ang Cavite, Laguna, Rizal, Siquijor, Davao City, Davao del Norte.
Samtang ang Negros Oriental ug Davao Occidental gipaubos sa alert level no. 4, nga mao ang pinka-estriktong COVID-19 alert level system.
Ubos sa alert level 2, dugang establisyemento ang maka-abli sa ilang negosyo sama sa mga karaoke bars, sinehan, contact sports gyms, ug kiddie playrooms ug playgrounds.
Sa alert level 3, ang kapasidad nga gitugot alang sa tanang gitogutang establisyemento gisakaan ug makabalik na sa operasyon ang mga sinehan ug teyatro.
Samtang ubos sa pinaka-estriktong alert level 4, ang tanang establisyemento gitugotan sa pag-operate sa limitadong kapasidad gawas lamang sa mga sinehan, kids amusement parks ug playgrounds, ug live voice o wind-pipe performances, teyatro, karaoke bars, ug contact sports establishments nga gidid-an sa pag-abli.
Sa alert level 1, ang tanang establisyemento gitugotan sa pag-operate sa full capacity.
Adlaw nga Miyerkoles, Oktubre 20, 2021, si Gob. Arthur Yap mipagawas sa Executive Order No. 51 nga nag-adopt sa COVID-19 alert levels system isip bag-ong community quarantine classification sa patigayon sa COVID-19 bases sa Inter Agency Task Force for the management of emerging infectious diseases guidelines ug sa implementasyon sa alert level. (ECB/PIA7 Bohol)
