TAGBILARAN CITY, Bohol, Oct. 19 (PIA) -- Giduso sa sektor sa negosyo ang pagpaluag sa restriksyon alang sa mga domestic travelers nga mobisita sa mga nag-unang tourist destinations sa nasod.

Si Presidential Adviser for Entrepreneurship Joey Concepcion atol sa gipahigayong Go Negosyo’s Bakuna Townhall Meeting niadtong Oktubre 15 mibutyag nga ang pribadong sektor nakigsabot na sa mga local government units (LGUs) sa Aklan, Bohol, Cebu, Palawan, Siargao, ug uban pang nag-unang tourist destinations aron e-exempt ang mga fully vaccinated nga mobyahe sa pag-presentar og reverse transcription-polymerase chain reaction (RT-PCR) test results sa ilang pag-abot.

Ang lalawigan sa Cebu, gawas sa syudad sa Cebu wala na nag-require sa mga bisita sa pag-presentar og RT-PCR tests sugod karong buwana.

Matud pa ni Concepcion nga mao kini ang gihangyo sa mga airline companies.

“The request of the airlines is to exempt fully vaccinated people from RT-PCR test. That is a major cost component for many of those traveling to these tourist destinations,” matud pa ni Concepcion.

Si Concepcion nagkanayon nga ang pribadong sektor nakadawat og positibong tubag gikan sa mga gobernador ug mayor.

“I am glad that the response is quite overwhelming. Everybody seems to be open to removing the RT-PCR test,” pagbutyag pa ni Concepcion.

Ang Inter-Agency Task Force (IATF) nag-require sa mga local travelers sa pagpresentar og negatibong RT-PCR test results sa pag-abot sa ilang destinasyon, mahinungdanon man kun essential o alang sa kalingawan kun leisure.

Apan may ubang LGUs nga naglu-ag na og restriksyon aron makadani og mga turista aron makabangon ang ilang lokal nga industriya sa turismo. (ECB/PIA7 Bohol)