TAGBILARAN CITY, Bohol, Oct. 20 (PIA) -- “Pagpabakuna pa gihapon ang yawe sa tanan nga pakigbatok sa coronavirus disease (COVID).”

Kini maoy giluwatan nga pahayag ni Australian Ambassador to the Philippines, His Excellency Steven Robinson, atul sa usa  ka informal  nga pagpakig-kukabildo sa mga sakop sa prensa sa Bohol.

Si Robinson, kinsa nakaanhi na sa Bohol niadtong 2019, mibalik alang sa mga opisyal nga gimbuhaton ug sa pagsubay sa mga malampusong nga proyekto nga gipangpundohan sa Kagamhanan sa Australia, lakip na usab ang pagpangumusta sa pagpakiglayog sa Bohol sa COVID.

Matud ni Robinson, mikabat sa A$80 milyones or kapin sa P3bilyones nga pundo sa Australia ang gihatag sa Pilipinas alang lamang sa ilang Development Assistance Program sa pandemya.

Samtang dinhi sa Bohol ug misubay sa mga community based assisted projects dinhi, wala magmakuli ang labing taas nga diplomat nga nagrepresentar sa Australia sa pagsugid nga dugay ra unta siya nga mobalik sa Bohol apan napugngan sa pandemya.

Sa iyang pagsubay sa Bohol, gipadayag usab sa opisyal nga niining ika 75 nga tuig sa pagsaulog sa Diplomatiko nga Katalian sa Pilipnas ug Australia, gipasalig niya ang mas lawom pa nga pagtinabangay sa duha  ka nasud, kang kinsa nga kasaysayan, milapus pa sa 75 ka katuigan nga opisyal nga katali-an.

Matud niya, bisan kon ang Australia giisip nga migamit sa usa   sa mga labing epektibo nga lakang batok sa COVID-19, nakadaiya pa gihapon ang ilang pamaagi, lamang, disiplina ang nagpatigbabaw.

Sulti pa sa ambassador, adunay mga lugar sa iyang nasud nga misagop sa halos imposible nga paagi sa pagpapas sa hulga sa sakit, may lugar usab nga ang gihimo, pagpadayon sa ilang kinabuhi ug pagpanginabuhi, apan nagmatngon sa sakit samtang may mipili usab sa pagpatuman sa mga lockdowns.

Apan, luyo niining tanan, ang pagpabakuna, matud pa ni Amb Robinson, mao gayud ang lintonganay sa tanan nga mga paningkamot.

Karon nga panahon, may pipila na  ka lugar sa Australia nga nakakab-ot na sa 80% nga pamakuna sa kinatibuk-ang populasyon, butang nga maoy nakaganoy sa pagbukas na sa ilang mga ekonomiya.

Ang New South Wales, andam na nga magbukas sa ilang ekonomiya sa hinay, dala niini, sugid niya.

Sa kaso sa Pilipinas, gibutyag sa opisyal nga “ang COVID, ania na kanato ug may purohan nga magpabilin na kini sa taas nga panahon, sama sa tuberculosis, influenza, polio ug uban pa.”

Niini, iyang gihingusgan pagpasabut nga  ang pagpabakuna gayud ang labing epektibo nga paagi batok sa sakit.

Ang Australia, matud pa niya, migahin na og P490M alang sa pagpalit og bakuna sa COVAX alang sa Pilipinas, samtang nagpadayon ang tinabangay sa duha  ka nasud sa paghiman sa  mga kasundalohan nga nagtrabaho sa COVID frontlines.

Miabut sa P600 milyones ang nahatag sa Australia sa nasud alang sa personal protective equipment sa mga kasundalohan nga anaa sa frontlines.

Lain nga P263M usab ang napahat gikan sa Devt Assistance Fund sa nasud alang sa logistical support sa Pilipinas ilabi na sa pagpadagan sa mga bakuna ngadto sa mga hilit nga lugar. (RAHC/PIA7 Bohol)