TAGBILARAN CITY, Bohol, Oct. 26 (PIA) -- Kon didto pa ipamuhunan sa lain, mahimong kini nadagit na sa mga mapangahason, apan kay gihulog sa legit nga butanganan isip kontribusyon sa Home Development Mutual Fund (HDMF), o mas nailhan nga PAG-IBIG Fund, ang imong dyutay nga tampo, nakapatukod na og 10,640 ka mga balay sa may trabahante nga may ginagmay nga kita.

Mahimo usab nga sa imong dyutay nga tampo, imong balay nga pangandoy, ma-imo.

Kini maoy gibutyag ni Leonardo Cirujales, Hepe sa Marketing and Sales Division sa PAG-IBIG Fund Bohol, didto sa Kapihan sa PIA.

Ang HDMF o Pagtinabangay alang sa kaugmaon: Ikaw, Bangko, Industriya ug Goberno (PAG-IBIG)  Fund nahimugso agi og pagtubag sa panginahanglan sa us aka nasugnong pagtigum ug barato nga pagpatukog og balay alang sa trabahante nga Pinoy.

Gipabarug niadtong Hunyo 1978 pinaagi sa Presidential Decree No. 1530, ang duha  ka panginahanglan maoy gitubag sa PAG-IBIG FUND.

Niadtong Marso 1979, gimandu pinaagi sa Executive Order No. 527 ang pagpabalhin gikan sa Government Service Insurance System ug Social Security System sa padumala sa pundo alang sa National Home Mortgage Finance Corporation.

Diha usay panahon nga ang PAG-IBIG Fund gipaubos sa National Home Mortgage Finance Corporation (NHMFC) apan sa kaduganyan, ang PAG-IBIG nahimong gawasnon sa NHMFC nakabaton og gawasnon nga katungod sa paghimo sa iyang mga lagda, samtang pinaagi sa PD 1752, gihimo na nga pugos ang pagpasakop sa PAG-IBIG sa tanang empleyadong sakop sa SSS ug GSIS.

Ang mga binuwan nga hulog sa mga sakop, subay sa balaod, gipuhunan sa PAG-IBIG Fund sa pabalay, ug ang puhunan alang sa pahuwam sa socialized housing, mikabat ngadto sa 10,640, ug kana sa unang kwarter sa tuig pa lamang.

Bisag pa sa pandemya, matud ni Cirujales, misaka ang pahuman sa socialized housing ngadto sa 24% sa kinatibuk-ang 43,573 ka housing loans nga napagawas sa ahensya gikan sa Enero ngadto sa Hunyo.

Kini nagpasabut nga ang tag us aka gatus nga imong gihulog matag buwan sa PAG-IBIG, maoy kabahin sa P44.34 bilyones nga gipagawas isip housing loans.

Gani, niini nga kantidad, P4.66 bilyones o 11 % ang napatukod sa socialized housing, matud niya.

Natuo ang Pag-IBIG FUND nga ang pagpanag-iya og balay, katungod sa matag Pilipino. Sa ato nga Affordable Housing Program (AHP), sayun na lang kini nga makab-ot sa mga trabahante nga igo ra ang kita.

Ang AHP gidesinyo alang sa mga sakop nga mokita lamang og P12 mil ang buwan, kini nga trabahante makakuha og pahuwam alang sa pabalay nga nagkantidad og 580,000 sa subsidized nga rate sa 3% matag tuig sulod sa 30 ka tuig.

Niini, ang binuwan nga hatagon, anaa lamang sa P2,445.30. (RAHC/PIA7 Bohol)