TAGBILARAN CITY, Bohol, Nov 12 (PIA) -- Duha na lang ka lugar sa Bohol ang adunay double figures sa kaso sa coronavirus disease (COVID-19), kini segun sa taho nga makit-an sa Emergency Operation Center (EOC) dashboard sa kagamhanang Probinsyal sa Bohol.

Nobyembre 12, 2021, nakapatik sa EOC dashboard nga ang Tagbilaran City ug Cortes na lamang ang may double figures sa aktibong kaso sa COVID-19.

Nianang adlawa, ang Tagbilaran adunay 31 ka aktibong kaso, samtang ang Cortes, adunay 11 ka aktibong kaso.

Hinuon, kon recoveries o ang pagka-uli-an gikan sa sakit ang hisgutan, mikabat na sa 3,856 ka pasyente nga nagka-COVID sa Tagbilaran ang nauli-an, samtang 113 na usab ang  mga residente dinhi ang namatay.

Sa Cortes, 361 na usab ang nahiuli-an na sa ilang gibati human matakdan sa COVID ug upat ka residente ang namatay sa COVID.

Sa Tagbilaran, matud ni Mayor John Geesnell Yap, milapas na sila sa 80%  ug maoy labing taas nga naabut sa us aka LGU sa kinatibuk-ang Central Visayas.

Sa iyang taho didto sa Duterte Legacy Caravan, malipayon nga gipaambit sa batan-ong mayor nga ang syudad usab maoy ika upat nga LGU sa tibuok nasud nga may labing taas nga vaccination rate.

Gani, sa mga taho, ang pagpamakuna sa Tagbilaran, midawat na sa mga dili nila residente basta lang nagtrabaho sa syudad.

Tungod usab niini, milaum na ang mga tinugyanan nga masolusyonan na ang pagkamatay sa mga residente tungod sa sakit samtang mapataas na usab ang recoveries.

Kasamtangan nga sa syudad, ang Cogon may labing daghan nga COVID-19 casualty sa 24.

Sunod na niini ang Bool nga may 14 ug Dao nga may 11 ka namatay.

Sa Poblacion 2, 10 na ang namatay, sama sa Mansasa. (RAHC/PIA7 Bohol)