TAGBILARAN CITY, Bohol, Nov. 12 (PIA) -- Gipasigarbo ni Tagbilaran City Mayor John Geesnell “Baba” Yap II ang pagpanguna sa syudad sa Tagbilaran sa vaccination rate sa tibuok rehiyon VII ug ika-upat sa tibuok nasod gawas sa National Capital Region.

Atol sa ika-upat ka adlaw ug katapusang destinasyon sa Duterte Legacy Caravan sa lalawigan sa Bohol nga nagdala sa tema nga “Barangayanihan Caravan Towards National Recovery” sa syudad sa Tagbilaran niadtong Nobyembre 11, gi-anunsyo usab ni Yap nga ang gidaghanon sa aktibong kaso sa COVID-19 sa syudad 35 na lamang.

Nagpasalamat ang batan-ong mayor sa nasudnong kagamhanan alang sa pagtabang sa ilang syudad aron makab-ot ang taas nga vaccination rating.

Matud pa ni Yap nga kanunay benepisyaryo ang syudad sa Tagbilaran sa mga programa ug proyekto sa nasunong kagamhanan nga gipangunahan ni Presidente Rodrigo Roa Duterte ug iyang gipalihog ang pagpaabot sa iyang kinasingkasing nga pasalamat ngadto sa Presidente ug ni Presidential Communications Operations Office (PCOO) Kalihim Martin Andanar sa paghatag kanila og mga COVID-19 vaccines ug sa kanunay nga pagsuporta sa mga proyekto sa syudad.

“Dahil sa tulong ng PCOO at sa tulong ng National Government ang Tagbilaran City ay number one (1) in the entire Region VII sa vaccination rate at number four (4) sa tibuok Pilipinas gawas sa National Capital Region (NCR),” matud pa ni Yap.

Atol sa gipahigayong hamubong programa sa Saulog Hall sa Tagbilaran City Hall Compound, nangapud-apod og toolkits ang Technical Education and Skills Development Authority (TESDA) alang sa Cookery NCII scholars sa Balik Probinsya program.

Gipahigayon usab ang turn-over sa Tulong-Trabaho Scholarship Program coupons alang sa Events Management Services NCIII, Tourism Promotion Services NCII, Bread and Pastry Production NCII, ug Driving NCII sa nga benepisyaryo sa syudad sa Tagbilaran.

Nanghatag usab ang TESDA og allowance nga nagkantidad og P1,000 – P 3,000 sa ilang mga estudyante. (ECB/PIA7 Bohol)