GARCIA HERNANDEZ, Bohol, Nov. 11 (PIA) -- Daku ang pasalamat ngadto kang Presidente Rodrigo Roa Duterte sa usa ka benepisaryo sa Pantawid Pamilyang Pilipino Program (4Ps) kay gihimo nan ga balaod ang programang naghatag og katilingbanong alibyo sa mga kabus.
“Daghang salamat sa Presidente Duterte kay sa imong pagpangulo, nahimo na nga balaod ang Republic Act 11310, o ang Pantawid Pamilyang Pilipino Program, kini daku kayo og tabang kanamong mga (kabus ug mga sakop sa) pantawid,” saysay ni Stella Bahan Todoc.
Si Todoc, nga taga Barangay Cambuyo niining lungsod, usa ka sakop sa 4Ps sukad pa niadtong 2012, personal nga misaysay sa maayong tabang nga gitanyag sa 4Ps kanilang mga kabus, didto sa gipahigayon nga The Duterte Legacy nga gidala sa Presidential Communications Operations Office (PCOO) sa mga kalungsuran sa Bohol gikan niadtong Lunes hnagtud pa sa Huwebes, ning semanaha.
Ang 4Ps mao’y nasudnong stratehiya sa pagpakunhod sa mga kabus ug pagpamuhunan sa tawo aron sa ila usab nga tabang, mapamaayo nila ang ilang kahimtang.
Mahimo kini sa 4Ps pinaagi sa pagpanghatag og conditional cash transfer (CCT) ngadto sa mga kabus nga banay sulod sa 7 ka tuig aron lamang makab-ut ang tumong niinng nahisgutan na sa unahan.
Segun pa usab, mahimo sa National Advisory Council (NAC) nga lugwayan pa ang lanat sa tabang sa 4Ps kon gikinahanglan.
Ang 4Ps una nan ga gipasugdan sa Administrasyon ni Presidente Gloria Macapagal Arroyo, ug miabut pa ngadto sa administrasyon ni Presidente Benigno Aquino III, apan nagpabilin nga nameligro nga mapapas na.
Daghan nang Administrasyon ang milabay apan wala gyud mapabalaod ang Pantawid, hangtud miabut si Duterte nga nagbili sa iyang di hingkalimtan nga legasiya.
Matud ni Todoc, ang 4PS gikuyogan pa sa daghan pa nga abag sa goberno ngadto sa mga kabus.
Sa 4Ps nga nagtutok sa pagtabang sa kabus nga makahatag solusyon sa ilang mga suliran sa kasanihan, nutrisyon ug edukasyon, anaa ang Family Development Sessions nga nagpakita sa kamahinungdanon sa kaugalingong pagtabang aron moasenso.
Nadawat usab nila ang Universal PhilHealth Benefits, ug P394,674 nga hinabang panginabuhian pinaagi sa Sustainable Livelihood Program sa DSWD, gawas pa sa maayong proyekto nga pagsemento sa ilang kadalanan subay sa Kapig Bisig Laban sa Kahirapan-Comprehensive and Integrated Delivery of Social Services.
Gisaysay usab ni Todoc ang nakuha nilang libre nga bansay sa Technical Education Skills Development Authority alang sa iyang bana nga kanhi pang-labor lang ang gisaligan.
“Labor ra unta siya sa una, karon nakakuha siya og bansay sa TESDA sa Small Metal Arc Welding, ug karon, makamao na mo welding," matud ni Todoc. (RAHC/PIA7 Bohol)
