TAGBILARAN CITY, Bohol, Nov. 16 (PIA) -- Giaprobahan na  ni Presidente Rodrigo Roa Duterte ang rekomendasyon sa Nasudnong Inter Agency Task Force (NIATF) nga magpatuman sa mga protocols sa paggamit og face shields, Nobyembre 15.

Kahinumduman nga una na  nga girekomendar sa NIATF didto sa Resolution No. 148-D niadtong Nobyembre 11 ang pagpabag-o sa mga protocols nga sumbanan sa paggamit sa face shields.

Segun sa rekomendasyon sa NIATF, pugos ang pagpasul-ob sa face shield ibabaw sa face masks sa mga lugar nga anaa sa Alert Level 5 ug mga lugar nga adunay granular lockdowns.

Sa sama  nga rekomendasyon, sa mga lugar nga anaa  sa Alert Level 4, gibugtaw nga ngadto sa mga local nga kagamhanan ug nga pribadong establisemento ang hukom kon ipugos ba o dili na ang pagpasu-ot sa face shields, gawas pa sa face masks.

Sa mga lugar ubos sa Alert Level 3, 2 ug 1, dili na pugos apan boluntaryo na ang basehan sa pagsu-ot sa face shield ibabaw sa face mask.
Ang Bohol anaa na sa Alert Level 2.

Dugang sa Memorandum, sa wala pa ikapatuman sa tibuok nasud ang Alert level System subay sa Executive Order No. 151 series of 2021, ang mga Lokal nga Kagamhanan maoy mag-igo kon imandu ba ang paggamit sa face shields sa mga lugar nga nasakop sa Omnibus Guidelines sa pagpatuman sa Community Quarantines sa Pilipinas.

Hinuon sa mga lugar nga gipa-ilawom sa Enhanced Community Quarantine ug mga lugar nga gipa-ilawom sa granular lockdown, pugos pa gyud gihapon ang pagpasuot sa face shield ibabaw sa face mask.

Dugang sa memorandum nga giluwatan ni Executive Secretary Salvador Medialdia sa katungod sa Presidente, kining natuki nga rekomendasyon, dili maglakip sa padayon nga pugos nga pagpasul-ob sa face shields sa mga lugar sama sa quarantine facility ug ospital o clinic, ug ang pugos nga pagpasul-ob niini sa tanan nga mga health care workers samtang anaa sa lugar trabaho-an. (RAHC/PIA7 Bohol)