CEBU CITY, Cebu, Nov. 17 (PIA) -- Ang Philippine Drug Enforcement Agency Central Visayas (PDEA-7) miingon nga anaa nay 15 ka mga local government units (LGUs) sa tibuok Rehiyon 7 ang nagtukod na og ilahang "Balay Silangan" nga modawat og mga kwalipikadong drug surrenderers nga ipaubos sa maong reformatory program.

Sa 15 ka mga Balay Silangan dinhi sa Central Visayas, pito niini ang operational na ug anaa mahimutang sa Siyudad sa Danao, mga lungsod sa Poro ug San Francisco sa isla sa Camotes, ug anaa usab sa mga lungsod sa Samboan, Oslob, Madridejos, ug San Remigio sa Probinsya sa Sugbo.

Adunay laing walo ka mga LGUs nga bag-ohay lang naglusad sa ilang kaugalingong Balay Silangan, kini ang sa Siyudad sa Sugbo; mga lungsod sa Sogod, Balamban, Daanbantayan, ug Pilar sa Probinsya sa Sugbo; ug sa Siyudad sa Canlaon, ug mga lungsod sa Ayungon ug Basay sab sa Probinsya sa Negros Oriental.

Giingon nga kining walo ka nga LGUs, gihapsay og giandam nalang ang mga building ug ubang facilities para sila opisyal nga makalusad sa ilang Balay Silangan.

Gidugang nga ang probinsya sa Siquijor ug Bohol nagsugod na sab og tukod sa ilang kaugalingong Balay Silangan.

Nagplano na ang ilang lokal nga kagamhanan alang sa paglusad usab niini.

Sa Rehiyon 7, ang Balay Silangan project nakapahimos na og 42 ka mga drug pushers nga gitawag og mga "reformist" diin sila malampusong nakahuman sa tulo ka buwan nga reformatory program.

Sa programang "KASAYURAN" niadtong Miyerkules, Nov. 17, gidayeg ni Leia Alcantara, information officer III sa PDEA-7, ang kining 15 ka mga LGUs ang nagpakabana sa pagsugpo sa problema sa ilegal nga droga sa ilang komunidad.

"We would like to commend these 15 LGUs because they have the wisdom to know that the drug problem is related to other problem in the community. Nakita nila nga kung i-solve ang drug problem ma solve pud tong laing problem sa komunidad," matod ni Alcantara.

Ang PDEA og mga LGUs naglantaw nga makighiusa sa pribadong sektor og uban pang organisasyon nga gustong motabang alang sa pagpalig-on og pag tukod pa og laing mga Balay Silangan.

"Any help nga pwede ma-extend sa mga NGOs (non-government organizations) dawaton gyud sa atong mga LGUs. All the help nga mahatag sa mga private organizations, very welcome kaayo. Katong mga LGU nga mag lisod og put up og Balay Silangan, pwede ra sad sila makig-MOA (memorandom of agreement) sa ilang mga silingan nga LGU," dugang ni Alcantara.

Karon nga padayung gipahingusgan sa gobyerno ang kampanya niini batok ilegal nga droga, giawhag ni Alcantara ang katawhan nga di magduha-duha pagsumbong kung anaa man silay napamatikdan og nahibaw-an nga mga illegal mga kalihukan sa ilang lugar ilabi na kung kini anaay kalambigitan sa illegal nga droga.

"Kung naa tay mga information about sa illegal activities sa inyung barangay, ayaw mo pagdumili og duol sa PDEA or sa PNP, rest assured nga ang mga information nga inyung ihatag kay confidential gayud na," sigon niya. (RGC/PIA-7)