TAGBILARAN CITY, Bohol, Nov. 23 (PIA) -- Ang Commission on Higher Education (CHED) Rehiyon 7, sa pakig-alayon sa Bohol Island State University (BISU) nilusad sa vaccination program nga gitawag og ‘Resbakuna Para Makabalik Eskwela’ alang sa mga kolehiyo ug unibersidad sa lalawigan sa Bohol niadtong Lunes, Nobyembre 22.
Ang ceremonial vaccination alang sa mga estudyante, magtutudlo ug ubang personahe sa mga kolehiyo ug unibersidad gipahigayon sa BISU Main Campus gymnasium ning syudad isip parte sa pagpangandam sa planong pagbalik sa face-to-face classes.
Kini human unang gipahibalo sa CHED niadtong Nobyembre 15 nga ang higher education institutions (HEIs) tugotan na sa hinay-hinay nga pagbalik sa limitadong in-person classes for all degree programs.
“Limited face-to-face classes are now allowed under Alert Levels 1, 2 and 3, subject to certain conditions,” matud pa ni CHED chairman Prospero De Vera III sa usa ka video message atol sa gipahigayong programa sa ceremonial vaccination.
Gidugang ni De Vera nga aron tugotan sa CHED nga makapahigayon sa face-to-face classes, kinahanglang e-retrofit o bag-ohon ang mga pasilidad aron protektado gikan sa COVID-19, sundon ang minimum public health standards ug bakunahan ang mga teaching ug non-teaching personnel sa usa ka tunghaan og dili moubos sa 70 porsyento sa kinatibuk-ang populasyon sa mga estudyante.
Ang programa nag-target pareho sa pampubliko ug pribadong higher education institutions apil sa mga municipal colleges sa nagkalain-laing lungsod sa lalawigan.
Gipangunahan nila CHED 7 director Maximo Aljibe ug BISU president Regucivilla Pobar ang ceremonial vaccination sa BISU nga gitambongan usab nila Tagbilaran City Mayor John Geesnell ‘Baba’ Yap II, Bohol Inter-Agency Task Force spokesperson Dr. Cesar Tomas Lopez, Provincial Disaster Risk Reduction and Management Office chief Anthony Damalerio ug Provincial Administrator Kathyrin Pioquinto
Ang mga bakuna nga gigamit sa ceremonial vaccination mao ang gitagana sa Department of Health (DOH) alang sa mga local government units.
Ang kagamhanang lokal sa syudad sa Tagbilaran nikomiter sa paghatag sa mga bakuna alang sa programa human ang syudad milabaw sa ilang target number of residents alang sa ilang vaccination drive batok COVID-19. (ECB/PIA7 Bohol)
