TAGBILARAN CITY, Bohol, Nov. 25 (PIA) -- Mihangyo na og endorsement ang Holy Name University (HNU) sa Bohol Inter Agency task Force on the management of Emerging infectious Diseases aron makakuha sila og pagtugot sa Commission on Higher Education (CHED) nga makasugod na og tanyag sa limitado nga face to face classes alang sa ilang medical courses.

Didto sa labing bag-o nga online nga tigum sa BIATF, nanghanyo ang HNU pinaagi ni Ruvih Joy Garrote, dean sa College of Medical Sciences sa nahisgutan nga tunghaan aron makahatag og pagdapig sa mga taga Bohol nga buksan na ang ilang College of Nursing ug Medical Technology alang sa limitandong face to face.

Ang mga nahisgutang mga kurso, lisud gayud kon dili makasulod sa mga laboratories sanglit mas maayo niini nga makasinati sa personal gayud ang nagtuon sa unsay iyang gitun-aw ug dili lamang igo rang mobasa og mamati sa lectures.

Ang pagsanghid sa HNU subay sa Joint Memorandum Circular No 001 sa Department of Health (DOH) ug CHED nga nagtugot na sa limitado nga face to face sa mga ekswelahan sa kolehiyo ug high school nga makasubay sa mga kondisyones aron katugotan sa ilang aplikasyon.

Lakip sa mga responsibilidad sa mga tunghaan nga nangaplay sa limitado nga face to face mao  ang ilang kapasidad sa pagsubay sa health and safety protocols, pagpahimog kausaban sa ilang mga pasilidad aron mapatuman ang social distancing ug pagpanghunaw, ug nga isolation rooms, ug  ang importante nga pagtugot sa lokal nga kagamhanan ugmga tawo nga may kalambigitan sa maong desisyon.

Subay usan sa laing dokumento, sa Guidelines on the Nationwide Implementation of Alert Levels System for COVID-19 Response, gitugotan na ang face to face classes sa mga lugar nga ubos sa Alert Levels 1, 2 ug 3, apan nagdepende usab sa mga kondisyones.

Kinahanglan nga himoong katunga lamang ang makasulod sa kapasidad sa usa ka lugar ug ang tanang magtutudlo ug trabahante sa nahisgutang tunghaan, bakunado na ang tanan.

Importante usab ang pagtugot sa LGU diin ang tunghaan mahimutang.

Sa higayon nga mahatagan sa BIATF ang HNU sa endorsement, makahimo na sila sa pagpa-usab sa ilang mga pasilidad aron ipauyon sa mga lagda batok sa COVID, ug kabuhi-an na sa kagamhanan ang ilang mga ocular inspection teams nga magvalidate sa mga tunghaan nga nangaplay sa face to face classes.

Sa IATF Resolution No. 148-G Series of 2021, niadtong Nobyembre 16, 2021, giaprobahan na ug gisagop ang gisugyot nga Phased Implementation sa Limited Face-to-Face Classes alang sa tanang Programs sa mga lugar nga ubos sa Alert Level 1 System alang sa COVID-19 Response sa CHED.

Gitugotan na usab ang CHED sa pagpatuman sa programa uban sa duha  ka hugnaan aron pagseguro sa mas luwas nga pagpabukas sa mga eskwelahan.

Ang duha ka hugna naglangkob sa pagpatuman niini sugod sa Disyembre 2021 paingon sa mga mosunod nga katuigan sa mga lugar ubos sa Phase I, ug sa Enero 2022 sa mga HEIs sa mga lugar ubos sa Alert Level 2.

Gawas sa HNU, nangandam na sab ang Bohol Island State University pinaagi sa pagpamakuna sa ilang mga estudyante atol sa Resbakuna, ug subay sa mga taho, lakip na ang University of Bohol. (RAHC/PIA7 Bohol)