TAGBILARAN CITY, Bohol, Nov. 29 (PIA) -- Agi og pag-awhag sa mga Bol-anon nga magpabakuna batok sa COVID-19, usa ka libo ka mga bakunado sa lalawigan ang mahimong makadaog og P2,000.00 sa raffle promo nga gitanyag sa Kagamhanang Probinsyal sa Bohol.

Pinaagi sa bakuna papremyo nga “Bakuna: Sana All Modaog pa ka sa Raffle!” mahatagan og kahigayonan ang mga nagpabakuna nga makadaog og P2,000.

Aron makaapil, kinahanglan mabakunahan ang usa  ka indibidwal bisag usa  ka dosis  sa bisan unsa nga brand sa bakuna batok COVID-19 sa 48 ka mga lungsod sa Bohol.

Gisugdan karong adlawa ang tulo  ka adlaw nga national vaccination drive nga gitawag og Bayanihan Bakunahan gikan Nobyembre 29 hangtod Disyembre 1.

Ang masterlist sa tanang nabakunahan sa Bohol ibutang sa Vaccine Information Management System – immunization registry (VIMS-IR) nga i-upload sa mga local government units.

“Didto i-upload sa mga LGUs ang mga ngalan sa mga nabakunan sa ilahang vaccination sites. Mao ang gamiton nga official raffle entry sa tanang nabakunahan sa Bohol on or before Dec. 1,” matud pa sa Facebook post sa Provincial Government of Bohol.

Gamiton ang Department of Information and Communications Technology (DICT) program alang sa random nga pagpili sa swerteng 1000 ka mananaog.

Ang cut-off date sa mga makasalmot niini taman lamang sa Disyembre 1, 2021. (ECB/PIA7 Bohol)