TAGBILARAN CITY, Bohol, Dec. 1 (PIA) -- Agi og pagsaulog sa Bonifacio Day, ang kagamhanang lokal sa syudad sa Tagbilaran mipahigayon og COVID-19 drive thru vaccination alang sa mga tricycle drivers, public utility vehicle drivers ug mga pribadong sakyanan lulan ang mga senior citizens ug persons with disability (PWD) niadtong Nobyembre 30 sa Tagbilaran City Hall Ground.

Si Ricky Tabaranza, 47 anyos nga tricycle driver nga taga Pamaong Extention sa syudad sa Tagbilaran mapasalamaton sa gipahogayong drive thru vaccination sa syudad tungod sa kadali ug kasayon nga gihatag niini kanilang mga drivers.

“Nindot kay di na me mag pila-pila sama sa mga malls. Diha ra gyud me bakunahan sakay sa among gi-drayban nga tricycle,” matud pa ni Tabaranza.

Ang City Health Office (CHO) nagbutang usab og mga COVID-19 vaccination sites sa Island City Mall, Alturas Mall ug BQ Mall nga gidumala sa 75 ka empleyado sa CHO ug  gidugangan sa 25 ka volunteer team alang sa tulo  ka adlaw nga National Vaccination Days nga nagsugod niadtong Lunes.

Si Tagbilaran City Mayor John Geesnell ‘Baba’ Yap II nga personal nga nag-inspeksyon sa mga vaccination sites, nagpasalamat sa publiko sa pagsanong sa panawagan sa gobyerno nga paspapasan ang pagpamakuna.

Nag-una ang syudad sa Tagbilaran sa Central Visayas ug ika-4 sa tibuok nasod sa mga LGUs gawas sa Metro Manila sa vaccination rate.

Ang syudad sa Tagbilaran usab ang may pinakataas nga administration rate o pinakadaghang nabakunahan batok COVID-19 sa ikaduhang adlaw sa National Vaccination Days sa Bohol niadtong Martes nga nikabat sa 3,805 ang nabakunahan.

Mga 36,693 ka Bol-anon ang nabakunahan sa ikaduhang adlaw sa Bayanihan Bakunahan National COVID-19 Vaccination Days niadtong Nobyembre 30.

Ang kagamhanang probinsyal sa Bohol nagtinguha sa pagbakuna sa 150,000 ka indibidwal batok COVID-19 sa tulo  ka adlaw nga national vaccination drive nga matapos Miyerkoles, Disyembre 1, 2021. (ECB/PIA7 Bohol)