TAGBILARAN CITY, Bohol, Dec. 3 (PIA) -- Makapamasko pa gihapon ang mga buot manguli sa Bohol nga mga nabakunahan na apan wala pa gihapon makakuha sa ilang gipamatud-an sa kagamhanan nga vaccination certificate.
Kini human giuswag ni Gob. Arthur Yap ang pagtugot sa temporaryo nga paggamit sa vaccination cards nga gi-isyu sa mga kalungsuran sa Bohol, gikan sa Disyembre 1 ngadto na sa Disyembre 31.
Ang pag-uswag, nagpausab sa epekto sa Executive Order 52-A, 52-B ug 52-C.
Pinaagi sa Executive Order No 52-D, series of 2021 nga gilagdaan ni Gob Yap Disyembre 1, gidasonan niini ang mandu nga inay negatibo nga resulta sa Reverse Transcription Polymerase Chain Reaction (RT-PCR) test, ang vaccination card nga sayon ra nga pekehon, hulipan sa vaccination certificate isip dokumento nga gamiton sa mga nabakunahan na mga mouli, subay sa Executive Order 52.
Apan sanglit nasugamak ang kadaghanan sa mga buot manguli sa Bohol sa lisud nga kahimtang pagkuha sa vaccination certificate labi na kay daghan pang LGUs nga wala mag-encode dayon sa ilang mga vaccination records, gipagawas sa gobernador ang Executive Order No. 52-A.
Ang nahisgutan nga Executive Order nagmandu nga inay ang vaccination certificate, temporaryo una nga gamiton ang vaccination card sa mga dili pa makakuha sa vaccinatin certificate apan kinahanglan kining mogamit niini nga makapakita sa iyang government issued nga ID card ug aprobadong S-pass.
Human sa pagkagulgot na usab sa mga focal persons nga mag-aprobar sa mga gipangayo nga s-pass sa mga mobyahe pabalik sa Bohol, lain na usab nga Executive Order ang gipagawas sa gobernador, ang Executive Order No 52-B, nga nag mandu nga mahimo na nga dili aprobado ang S-pass nga pataban sa vaccination card ug government issued ID isip mga dokumento sa pagbyahe.
Matud sa gobernador, ang pag-apply sa S-pass, igo na nga magamit sa pagtabok balik sa Bohol.
Alang sa mga wala pay bakuna, magpabilin ang rekisitos nga negatibong resulta sa coronavirus disease test pinaagi sa RT-PCR nga nakuha 72 oras sa dili pa molawig paingon sa Bohol, government issued ID ug S-pass, samtang ang 11 anyos paubos nga mibyahe kauban sa bakunadong ginikanan o nagbantay niini, dili na pangayoan sa RT-PCR segun sa Executive Order No 52-C.
Sa kakuwang pa gihapon sa kasayon nga makakuha og authenticated ug validated sa goberno nga vaccination certificate, labi na sa nagkadaghan nga mga buot manguha niini nga mga byahedor human sa dinaghan nga pamakuna, giuswag pa ang temporaryo nga paggamit sa vaccination card nga gi-isyu sa mga kalungsuran sa Bohol, subay sa EO 52-D.
Kini usab nagtangtang na sa barangay certification, letter of acceptance isip mga gikinahanglan sa pagbyahe subay sa una nga nga gimandu.
Gimanduan usab sa EO 52-D ang mga LGUs sa pagsunod sa mga nahisgutan nga mga lagda, alang sa hanotoy nga pagbyahe pauli sa mga Bol-anon niining panahon sa Pasko. (RAHC/PIA7 Bohol)
