TAGBILARAN CITY, Bohol, Dec. 2 (PIA) -- Daghang local government units (LGUs) ang nihangyo sa gobyerno nga ipadayon lang ang Bayanihan, Bakunahan nationwide COVID-19 vaccination drive, matud pa ni National Vaccination Operations Center (NVOC) chairperson Usec. Myrna Cabotaje.

Kini ang rason nganong gi-uswag hangtod Biyernes, Disyembre 3, ang Bayanihan, Bakunahan vaccination drive gikan sa orihinal schedule nila nga gikan Nobyembre 29 hangtod Disyembre 1 lang unta.

Matud pa ni Cabotaje nga kadaghanan sa mga LGUs nga nanawagang i-uswag ang nationwide vaccination drive gikan sa Bangsamoro Autonomous Region in Muslim Mindanao (BARMM).

Kahinumdoman nga target sa gobyerno nga makabakuna og 9 milyong COVID-19 vaccines sa gipahigayong Bayanihan, Bakunahan nationwide vaccination drive.

Gi-awhag sa gobyerno ang mga wala pa nagpabakuna nga pahimoslan ang ekstensyon taman Disyembre 3, 2021.

Una nang namahayag ang gobyerno nga aduna pay phase 2 ang Bayanihan, Bakunahan COVID-19 national vaccination drive sa tunga-tunga sa Disyembre. (ECB/PIA7 Bohol)