TAGBILARAN CITY, Bohol, Dec. 14 (PIA) -- Nipasidaan ang Social Security System (SSS) sa mga miyembro niini nga mokuha og Unified Multi-Purpose Identification (UMID) Card nga dili makig-transaksyon sa mga online fixers.

Matud pa ni SSS President ug CEO Aurora C. Ignacio, ang SSS lamang ang awtorisadong modawat og aplikasyon sa UMID cards ug maghatag niini sa mga miyembro mao nga walay rason aron makig-transaksyon sa online fixers sa pagkuha sa maong card.

Gidugang pa ni Ignacio nga ang biometrics data capturing nga mahinungdanong proseso sa UMID cards himuon lamang sa mga SSS branches.

“We are reminding our members to refrain from transacting with fixers to avoid any inconvenience,” matud pa ni Ignacio.

Gipahinumdoman usab sa SSS ang mga miyembro niini nga mag-book una og appointment sa branch nga gustong adtuan gamit ang Appointment System sa My.SSS Member Portal aron malikayan ang kakuyaw nga matakdan sa coronavirus disease (COVID-19).

Kwalipikadong makakuha og UMID Cards gikan sa SSS ang mga miyembro nga adunay bisan usa  ka kontribusyon.

Libre usab ang UMID Cards alang sa first-time applicants, apan adunay bayad nga P200 sa mga magpailis o mag-renew niini.

Gipahibalo usab sa mga miyembro sa SSS ang pagkalangay sa produksyon ug  availability sa UMID Cards “until further notice.” (ECB/PIA7 Bohol)