CORTES, Bohol, Dec. 16 (PIA) -- Napulo ug duha  na lang ka bag-o  nga kaso sa coronavirus disease (COVID-19) ang nalista sa Bohol karong adlawa, unang adlaw sa Misa de Gallo.

Ang napulo ug duha ka kaso giunhan sa duha ka kaso sa Lila, duha sa Cortes ug duha usab sa Tagbilaran samtang may tagsa tagsa ka kaso sa COVID didto sa mga kalungsuran sa Bilar, Antequera, Tubigon, Sagbayan, Alicia ug President Carlos P. Garcia.  

Sa Lila, ang duha ka kaso pareho nga anaa sa Barangay La Fortuna, sa Cortes ang duha ka kaso anaa sa Barangay Malayo Norte ug sa Barangay Rosario, samtang ang sa Tagbilaran, usa sa Mansasa ug laing usa sa Poblacion II.

Sa mga kalungsuran: sa Bilar, ang nag inusarang nahibilin nga bag-ong kasa anaa sa VillaSuerte, sa Antequera, sa Celing, sa Tubigon, anaa sa Cahayag, sa Sagbayan, anaa sa San Vicente Norte samtang sa President Carlos P. Garcia, ang bag-ong kaso anaa sa Lipata.  

Dungan niini, hangtud gahapon, gawas sa katapusang nataho nga 12 ka aktibong kaso, natala ang ikaduhang adlaw Decembre 15 ang wala nay bag-ong kaso sa COVID-19 nga nakompirmar sa tibuok Bohol.

Kini segun sa kasayuran nga gipaambit sa Emergency Operations Center Sa Provincial Vaccination Operations Center  (EOC-PVOC).

Gikan sa Decembre 10, wala na usab natala nga dugang nga namatay sa Bohol ug nagpabilin nga anaa na sa 580 ang natala nga mga kamatayon dala sa COVID-19.

Niining adlawa usab samtang nagpadayon ang pagpangandam sa pagbalik sa ikaduhang hugna sa National Vaccination Drive sa Decembre 20-22, giaghat ang mga nagpadagan sa mga vaccination centers ug cold storage facilities sa mga bakuna nga iandam na ang mga generators.

Kahinumduman nga may mga bahuna nga dali rang madaut kon mabutang sa tipiganan nga dili haum sa gikinahanglang kabugnawon aron dili mamatay ang elemento nga anaa sa bakuna.

Kini agi usab og pagpangandam sa higayon nga mapawong ang suga tungod sa kusog nga hangin nga dala sa bagyo.

Dinhi sa kinatibuk-ang Central Visayas, mikabat na sa 208 ka bakuna ang nasayang, segun sa  tago sa Department of Health Center for Health and Development. (RAHC/PIA7 Bohol)