PUERTO PRINCESA,PALAWAN (PIA) -- Nagsimula na noong Enero 4 ang Oplan Ligtas Pamayanan (OPL) program ng Bureau of Fire Protection (BFP)-Puerto Princesa City para sa taong 2022.

Ayon kay City Fire Director Chief Inspector Nilo T. Caabay Jr,, dahil bawal ang face to face, ginagawa nila ito sa pamamagitan ng public address kung saan nag-iikot ang kanilang mga tauhan sakay ng fire truck at nagbibigay ng mga paalala para maiwasan ang sunog.

Aniya, naka-iskedyul na ang kanilang OLP sa 66 na barangay at sa katunayan kahit sa malalayong lugar tulad ng Bgy. New Panggangan (na kailangang pang sumakay ng bangka para marating) ay pinupuntahan ng kaniyang mga tauhan para magbigay paalala dahil lubhang napakahalaga nito.

“Malaking bagay po kasi na paalalahanan yung ang ating community kung papaano protektahan ang kanilang aria-arian, kung saka-sakaling magkaroon ng emergency sa kanilang lugar ay madalas ipinaalala natin yung  hotline natin sa opisina para matugunan kung saka-sakaling magkaroon ng problema sa kanilang lugar”, saad pa ni Caabay.

Ang PPC Fire Station HOTLINE ay Smart-09257077710, Globe-09778551600 at ang kanilang landline ay 433-0012/434-2076/160. Kinumpirma rin ni Caabay  na noong 2020-2021, parehong nasa 27 sunog ang naganap sa lungsod kung saan karamihan sa mga ito ay dahil sa mga appliances na hindi nabunot sa outlet at ang hindi matatag na  daloy ng kuryente sa lungsod.

Samantala, bilang pag-obserba sa  BFP Year-Round Fire Safety Awareness Program, ang Bureau of Fire Protection ay itinakda ang buwan ng Enero bilang Fire Code Revenue Awareness Month kung saan bago maisyuhan ng Business Permit ang isang establisyemento, bagong applikasyun man o renewal, lahat ay dapat na magbayad ng Fire Code Fees at sumailalim sa  Fire Safety Inspection alinsunod sa Revised IRR ng RA 9514 o The Fire Code of the Philippines, dahil dito ay  nagtayo ng Business One-Stop-Shop (BOSS) 2022 sa New City Hall, Brgy Sta. Monica, ang PPC Fire Station.(MCE/PIA-MIMAROPA, PALAWAN)