TAGBILARAN CITY, Bohol, Feb. 9 (PIA) -- Kalim-an og lima ka adlaw human magupok ang mga tore nga gikaburan sa 138KiloVolts (KV) nga gisaligan sa korente sa Bohol, nasumpay na ang temporaryong mga hulip nga tore, ug nakasulod na ang koryente gikan sa Leyte alas 4:03 sa hapon, February 9 2022, taho sa National Grid Corporation of the Philippines (NGCP).

Kahinumduman nga napawong ang suga nga dagitab sa Bohol niadtong hapon sa Disyembre 16, diha nga ang bagyo nga Odette nakaingon sa pagtrip sa linya nga gikan sa Leyte.

Wala magdugay, ang linya nga giingon nga labing taas nga kabod sa tibuok nasud, nahagsak usab tungod sa pagkapukan sa dagkong espesyal nga poste nga puthaw, nga nagdala sa gahum dagitab gikan sa isla sa Carlos P. Garcia, tabok sa Basiao Channel ngadto sa Tapal Ubay.

Ang nagupok nga espesyal nga tore, gihimo didto sa Germany ug gidisenyo nga molahutay sa 100 kilometros matag oras nga hangin.

Ang nag atbang nga mga tore, usa ka kilometro ang kalayoon sa usag usa, maoy labing taas sa tibuok nasud sa 200 metros, kay gikinahanglan nga makalusot sa ilawom niini ang mga barko nga mag agian sa Basiao Channel.

Kon paabuton pa sa NGCP ang puli nga tore nga ikahulip sa nahagsak, dangtan pa og pipila ka buwan nga magngiob ang labing dako nga bahin sa Bohol.

Aron temporaryo nga hatagan og solbad ang panginahanglan sa korente sa Bohol, mihukom ang NGCP nga magpabarug og unom ka mga tore nga apil sa Emegency Restoration System (ERS) aron maoy modawat sa sangkad nga korente gikan sa Leyte.

Gikan sa gibanabana nga pipila ka buwan nga tagal, napamubo sa ERS ang timeline sa NGCP ang pagpabalik sa korente gikan sa Leyte, ngadto na sa Pebrero 15.

Apan, gahapon sa hapon, malampuson nga gitapos sa NGCP ang trabaho sa mga tore aron mapakutay og balik ang korente gikan sa submarine cable saka sa Carlos P. Garcia terminal ngadto na overhead sa tore sa Popoo tadlas sa Tapal Ubay lahos na sa 138kV Line substation sa Imelda.

Gikan sa NGCP Imelda substation, ang korente ipang apud apod na sa mga substations sa BOHECO 1, BOHECO 2 ug BLCI.

Matud sa NGCP, ang ERS, temporaryo nga by-pass line hangtud mapabarug na ang permanente nga tore nga puthaw.

Ang pagsumpay sa kutay sa 138KV line nahitabo nga nasayo og unom ka adlaw sa wala pa mapupos ang gitagal sa NGCP nga pagpabalik sa korente.

Dugang sa NGCP, kini nga nasampit nga linya, magpakatay sa 60% sa supply sa korente alang sa Bohol gikan sa mga supply sa Visayas Grid nga naglangkob sa geothermal, coal ug solar power.

Ang permanente nga towers nga kasaligan gayud, kasamtangan nga nagpadayon nga gidesenyo nga molahutay sa mas kusog nga bagyo.

Kini gilauman nga mapabarug sa umaabut nga Abril niining tuig. (RAHC/PIA7 Bohol)