IPIL, Zamboanga Sibugay, Mar 7 (PIA) – Nagpatuman ug scholarship program ang Sangguniang Kabataan Federation sa Dumingag, Zamboanga, Del Sur alang sa mga kabatan-onan. Ang maong programa ilawom sa Genuine People’s Agenda (GPA), matud pa ni Leonel Dinawanao, SK Federation President.

Gipahiibalo ni Dinawanao nga ang pederasyon naglantaw sa edukasyon sa mga kabatan-unan isip prayoridad, maong seryoso sila niini sa pagpaningkamut nga matabangan ang kabatan-onan nga mahatagan sa libreng tuition fees pinaagi sa GPA nga ilang gipatuman kauban sa LGU.

Dugang pa sa SK Federation President nga kanunay nilang gi-monitor ang mga scholarship grantees ug giablihan nila ang ilahang SK Office aron nga moanha ang mga kabatan-onan nga adunay online class ug uban pang mga buluhaton bahin sa pag-eskwela.

Gipahibalo usab niya nga ang SK Federation kauban sa Technical Education Skills Development Authority (TESDA) molusad karong Biyernes, Marso 11 sa GPA Youth Scholarship Program alang sa Out-of-School Youth (OSY), volunteers, ug uban pang mga aktibong kabatan-onan.

“Tabangan namo sila nga makakuha sila ug NCII,” matud pa niya.

Apil sa maong training mao ang Computer System Servicing, Electrical Installation and Maintenance, welding ug uban pa.

Ang GPA Youth Scholarship Program, usa ka komprehensibo nga programa sa gobyerno sa lungsod sa Dumingag. Usa ka giya sa katawhan nga gipatuman subay sa motto sa LGU “Ilingkawas ang katawhan gikan sa kalisod, kagutom ug sakit.” (GCC/Lorenzo Ceazar Patayan /GIP-PIA9-Sibugay/JPA-Zamboanga Sibugay)