TAGBILARAN CITY, Bohol, March 22 (PIA) -- Gilagdaan na ni Presidente Rodrigo Roa Duterte ang balaod nga nag-amyenda sa Public Service Act (PSA), nga nagtinguhang tugotan ang hangtod 100% foreign ownership sa public services sa nasod.

Ang Republic Act No. 11659 o “An Act Amending Commonwealth Act No. 146” o mas giila isip “Public Service Act” nga naamyendahan, gilagdaan sa Pangulo sa usa  ka seremonya sa Rizal Hall sa Malakanyang atubangan sa mga magbabalaod ug uban pang opisyal sa gobyerno.

Ubos sa gi-amyendahang PSA, ang mga industriya sa telecommunications, railways, expressways, airports, ug shipping i-konsiderang public services diin tugotan ang 100 posyentong foreign ownership sa mga nahisgotang sektor.

Apan nagpabiling restricted pa gihapon alang sa full ownership ang mga foreign nationals sa ubang mga sektor sama sa public utility vehicles, water, electricity, petroleum pipelines ug seaports.

Nagtuo si Presidente Duterte nga pinaagi sa maong balaod, mas daghang mga global investors ang ma-aghat sa atong nasod, mahimong moderno ang pipila ka sektor sa public service ug mapaayo ang paghatod sa mga importanteng serbisyo.

Matud pa usab sa Pangulo nga makatabang kini apil na usab ang gi-amyendahang Foreign Investments Acts aron madasig ang ekonomiya ilabi na ang mga lokal nga negosyo.

Gilauman usab nga mas daghang mga trabaho ang magbukas alang sa mga Pilipino, mapakusog ang basic services ug maghatag usab kini og dalan sa binayluay og kahanas ug teknolohiya sa mga foreign investors sa nasod. (ECB/PIA7 Bohol)