TAGBILARAN CITY, Bohol, March 24 (PIA) -- Gi-anunsyo niadtong Marso 23 sa Philippine Atmospheric, Geophysical and Astronomical Services Administration (PAGASA) ang bag-ong minimum wind speed alang sa mga super typhoon ug gibag-ong tropical cyclone wind system (TCWS) sa nasod.

Matud pa sa PAGASA nga ang usa  ka “super typhoon” angay adunay gikusgon nga maximum sustained winds nga dili moubos sa 185 kilometers per hour gikan sa kanhing gikusgon nga 220 kph.
 Ang kaniadtong minimum wind speed requirement alang sa usa  ka super typhoon mas taas kaysa sa mga silingang nasod nga Japan, Korea, Hong Kong, Malaysia, Taiwan ug  China.

Gibag-o usab sa PAGASA ang TCWS nga karon nisibo sa mga mosunod nga kategorya: Signal Number 5 (Super Typhoon) – karon 185 km/h o mas taas pa gikan sa kaniadtong mas labaw pa sa 220 km/h; Signal Number 4 (Typhoon) – 118 ngadto sa 184 km/h na karon gikan sa kaniadtong 171 ngadto sa 220 km/h; Signal Number 3 (Severe Tropical Storm) – 89 ngadto sa 117km/h na karon gikan sa kaniadtong 121- 170 km/h; Signal Number 2 (Tropical Storm) – 62 ngadto sa 88 km/h na karon gikan sa 61-120 km/h kaniadto; ug Signal Number 1 (Tropical Depression) – 39 ngadto sa 61 km/h na karon gikan sa 30 - 60 km/h kaniadto.

Samtang gitangtang usab sa PAGASA ang mga pangalan sa tulo ka bagyong nagbilin og grabeng kadaot nga niigo sa nasod niadtong tuig 2021 nga mao ang Jolina, Maring, ug Odette. Alisdan kini og mga pangalan nga Jacinto, Mirasol, ug Opong, base sa pagkasunod, ug gamiton sa 2025.

Sa kinatibuk-an, adunay 47 ka pangalan ang na-decommission gikan niadtong tuig 2001, matud pa sa PAGASA. (ECB/PIA7-Bohol)