TAGBILARAN CITY, Bohol, March 28 (PIA) -- Usa ka pasyente nga may gipakita nga moderate symptoms, 2 ang may mild symptoms ug 10 ka pasyente ang walay gipakita nga simtomas samtang may usa  ka bag-ong kaso ang natala Marso 28, samtang ang Bohol padayon nga nagsagubang sa COVID-19. 

Kini samtang nagpabilin nga anaa sa 680 ang kinatibuk-ang ihap sa mga Bol-anon nga nabiktima sa COVID-19 nga nitapnas sa Bohol sukad pa niadtong sayo sa 2020.

Sukad usab niatong panahona hangtud karon, mikabat na sa 22,954 ka mga Bol-anon ang nasakit kay natakdan sa nahisgutang makalilisang nga sakit mananakod, samtang 22,261 kanila ang kompirmado usab nga nanga-ayo na.

Kini nga mga datus subay usab sa gipaambit sa Bohol Inter-Agency Task Force on the Management of Emerging Infectious Diseases sa iyang inadlaw nga taho, Marso 28 sa may alas 8:00 sa buntag.

Gamit ang susama nga datus nga nakuha sa BIATF sa dashboard sa Emergency Operations Center, diin nakabase ang Provincial Vaccination Operations, nanguna na ang Candijay sa kadaghanon sa aktibong kaso, nga may tulo.

Kini gisundan sa Tagbilaran City ug Carmen nga parehas nga may duha ka kaso.

Ang Loon, Cortes, Lila, Calape, Batuan, ug Tubigon may tagsa usab ka aktibo’ng kaso sa COVID-19, sa nahisgutan nga adlaw.

Sa kahimtang usab sa mga tambalanan nga  nanga-lagad sa mga kaso sa COVID-19 sa Bohol, sa primary hospitals ug clinics, sa mga katre sa Intensive Care Units, may upat ka bakante, sa COVID wards, may 46 nga bakante samtang may upat ka bakante nga mechanical ventilators.

Sa secondary hospitals, puno pa gihapon ang ICU sa ACE ug okupado usab ang mechanical ventilators sa COVID-19 sa ACE Medical Center, ug labaw sa 66% ang mechanical ventilator usage sa non-COVID ventilators.

Sa Holy Name University Hospital, 50% pa gihapon ang ICU utilization samtang naa pa sa 80% ang paggamit sa Non ICU beds.

Sa Tertiary hospitals sama sa Gov. Celestino Gallares Memorial Hospital, nagpabiling taas sa 76% ang gamit sa COVID ICU ug naa sa 70% ang paggamit sa COVID ward.

Kini samtang nagpabilin nga anaa pa sa Alert Level 2 ang Bohol.

Dugay rang nangandoy ang mga Bol-anon nga unta makabalik na ang kinatibuk-ang pagbukas  sa ekonomiya sa Bohol sama sa ubang mga lugar sa nasud.

Apan, subay sa patakaran, gikinahanglang moabut na sa 80% ang vaccination sa Bohol sa mga senior citizens ug 70% sa kinatibuk-ang populasyon.

Kasamtangang naaa pa sa 60% ang vaccination coverage sa Bohol, samtang may lapas pa sa 50% ang paggamit sa mga hospitals, nga kinahanglang mapaubos sa 50% aron makaapil ang Bohol sa gitimbang-timbang nga mga lugar nga ikapaubos sa Alert Level 1. (RAHC/PIA7 Bohol)