TAGBILARAN CITY, Bohol, March 29 (PIA) -- Nipasidaan ang Commission on Elections (Comelec) sa mga lokal nga kandidato nga ilang gibantayan ang mga kalihokan sa kampanya apil ang social media taliwala sa mga alegasyong vote buying ug uban pang paglapas nga may kalabotan sa eleksyon.

Apan giklaro sa Comelec nga mahimo lamang mapanubag ang mga lokal nga kandidato nga may paglapas sugod niadtong ika-25 sa buwan sa Marso nga maoy pagsugod sa campaign period sa local elections.

Matud pa ni Comelec Commissioner George Garcia,  uso sa social media ang pipila ka mga aktibidad sama sa pa-raffle, o pa-premyo ug may gigamit pang bata sa programa mao nga angay kining likayan.

Si Garcia nagkanayon nga sila hingpit nga nahibalo sa pipila ka mga politiko nga naglikay sa balaod sa pag-ingong dili pa sila makunsiderar nga kandidato sa dihang gihimo ang mga gidili nga mga buhaton apan tungod kay giingong nagsugod na ang panahon sa pagpangampanya alang sa lokal nga lebel, mahimo nang manubag ang mga kandidatong adunay pagpanglapas.

Gi-awhag usab ni Garcia ang mga kandidato nga i-monitor ang mga aktibidad sa ilang kaatbang ug i-report ang bisan unsang paglapas ngadto sa Comelec.

Gi-aghat usab sa commissioner ang publiko nga moduso og reklamo kun nakita nila ug may ebidensiya batok sa pagpanglapas sa usa  ka kandidato sa election rules diin una nang gipahayag sa Comelec nga tangtangon nila ang mga reklamo nga giduso sa social media ug ila kini dayon himuan og aksyon.

Samtang gitakda nang magpili og mga mahimong miyembro sa tukorong Task Force Kontra Bigay batok sa pagpanglimbong ug vote-buying ang Comelec sa Miyerkules, Marso 30.

Matud pa nga apil sa mga miyembro sa Comelec ang Department of Justice, National Bureau of Investigation, Philippine National Police, Armed Forces of the Philippines ug  ang Philippine Information Agency.

Ubos sa Omnibus Election Code, ang pagpamalit ug pagbaligya og boto mahimong pahamtangan og silot nga pagkabilanggo gikan usa  hangtod 6 ka tuig, matud pa sa Comelec. (ECB/PIA7 Bohol)