TAGBILARAN CITY, Bohol, March 28 (PIA) -- Kon kaniadto, paskilan na sa Social Security System (SSS) ang pultahan sa mga establisemento nga wala makabayad sa kontribusyon sa ilang trabahante, medyo arang-arang na karon.

Sa pagpangulo ni SSS President ug Chief Executive Officer Michael G. Regino, inay shame campaign, shock and awe ang sistema nga gipatuman sa ahensya aron pag-agni sa mga may napalta nga kontribusyon, sa pagbayad sa ilang kuwang.  

Inay pakauwawan ang mga employer sa ilang pagkapalta sa bayranan sa ilang mga trabahante, gibisita pa gihapon sa bahan sa SSS Run After Contribution Evaders (RACE) ang mga establisemento nga wala na maybayad-bayad, aron pahinumduman sa ilang obligasyon.

Dayon, tanyagan sila sa mga programa sa SSS, ilabi na ngadto sa mga wala makabayad sa kontribusyon sa ilang mga trabahante.

Ang pagkapalta sa pagbayad sa kontribusyon sa mga trabahante ug sa ilang share niini, maoy kina-ingnan nga maybuho ang kontribusyon ug mahikawan na ang mga trabahante sa ilang mga benepisyo ug serbisyo nga gikan sa SSS sama sa benepisyo medical, pension, retirement, abag sa kamatayon, abag sa pagkabalda, maternity benefits, tabang sa pagkapalta sa trabaho, mga loans ug abag sa kalisud sa panahon.

Usa pa, ang pagpalta sa pagbayad sa kontribusyon, usa ka pagsupak sa Social Security Law nga makapapriso ug makapamulta sa mga hingtungdan.

Inay paskilan sa makaulaw nga pahibaw nga wala na makabayad, ang RACE Team na mismo ang misugid sa mga employer kabahin sa kasamtangan nga Pandemic Relief and Restructuring Program (PRRP) sa SSS.

Alang sa mga employer nga wala na makabayad sa ilang tumbas nga kontribusyon alang sa ilang trabahante, adunay PRRP 2: Kadtong nakapalta sa pagbayad sa kontribusyon sukad Nobyember 21, 2021 ngadto sa Mayo 19, 2022, mahimo silang maka-avail sa condonation program, matud sa SSS.

Gawas pa, aduna usay PPRP 3 o ang Enhanced Installment Payment Program nga bukas usab alang sa mga moaavail niini taman sa Nobyember 21, 2022.

Ubos ning nahisgutang mga programa, kon napamatud-an nga naglisud gtyd sa epekto sa pandemya, mahimong ang wala mabayri na lamang nga kontribusyon ang apson, ug dili na tingling sa SSS ang multa sa pagkapalta.

Gani, pwede nga bayaran ang kuwang sa usa ka full payment o data-data sulod sa duha  ka tuig alang sa PRRP 2 ug 9 ka buwan ngadto sa lima ka tuig, depende sa kadako-on sa delinquency, matud ni SSS Bohol Branch Manager Engr Alieta Basubas.

Busa, subay niini kadtong mga employer nga apektado sa pagka-sira sa trabaho tungod sa COVID, o paglisud sa ekonomiya, mahimo silang mo avail niini, pasabut ni Atty Alberto Montalbo, Visayas Acting Vice President sa SSS.

Sa mga interesado, ug kadtong tataw nga may suliran sa pagbayad, adtoa lang ang inyong Account Officers sa SSS aron makauha niining mga nahisgutang programa, pasabut sa SSS. (RAHC/PIA7 Bohol)