CEBU CITY, Cebu, May 24 (PIA) -- Sugod buwan sa Hunyo karong tuiga, ipatuman na sa Philippine Health Insurance Corporation (PhilHealth) ang bag-ong premium contribution rate alang sa mga miyembro niini.
Matod sa bag-ong gipagawas nga PhilHealth Advisory No. 22-0010, ang mamahimu na unyang premium rate nga bayaran sa mga miyembro anaa na sa 4% karong tuiga.
Ang usbaw sa porsyento sa kontribusyon gibase usab sa gimando sa Section 10 sa RA 11223 o ang Universal Health Care Law kung diin nakabutang ang premium rates sa PhilHealth nga kinahanglan bayaran sa tanang miyembro kung diin sa tuig 2022 anaa sa 4% ang premium rate.
Ang kantidad sa maong kontribusyon mag depende sa basic monthly income alang sa mga employed mga miyembro kung diin ang porsyento nga kuhaon gibatbat sa nahistogang balaod.
Dugang niini, ang 4% nga bag-ong premium rate epektibo nga ipatuman sa mga miyembro nga adunay monthly income nga naggikan sa P10,000 hangtod P80,000.
Ang pag papatuman sa pag-usbaw sa premium rate giingon nga retroactive kung diin kinahanglan nga mabayran sa mga miyembro ang wala nila mabayri nga tig 1% gikan sa buwan sa Enero hangtud Mayo kay diin sa miaging tuig 2021 anaa lamang sa 3% ang gi implementar nga PhilHealth premium rate.
Apan giklaro sa ahensya ngadto sa ilang mga miyembro nga ang pagbayad sa differential nga 1% dili kinahanglan usahon, kay kini pwede mabayran hangtod sa buwan sa Disyembre ning tuig 2022.
“Sa atong mga members dili rata mabalaka kay pwede ra ninyu i-settle ang differential later on, for our self-paying members pwede kamu mobayad pinaagi sa gcash, paymaya, debit card, ug credit card, samtang alang sa atong mga employed members atong ipahibaw ug balik nga ang bayranan sa kontrisbuyon pagatunganon sa employee and employer,” matod ni Dina Cinchez, ang public relations officer sa PhilHealth-7.
Sa pagtaas sa premium rate, gipadayag sa PhilHealth ang mga kausaban ug kalambuan usab nga mahitabo ngadto sa mga benepisyong medikal nga pwedeng matagamtam sa ilang mga miyembro.
Karon gipalig-on sa PhilHealth ang gitawag nga Primary Care family Package nga ilang gimugna sa layo paman ang pagpatuman sa 4% nga premium rate.
Naglangkob niini nga benefit package mao ang regular nga medikal nga konsultasyon, diagnostic tests, ug mga tambal alang sa mga sakit nga wala nagkinahanglan og pagkaospital.
Nagpadayun usab ang ahensya sa ilang mga benefit packages nga may kalambigitan sa COVID-19 kung diin kini gilangkuban sa RT- PCR tests, community isolation benefit package, ug hospital treatment batok sa maong sakit.
Gidasig usab ang mga miyembro nga moduaw sa mga primary health care providers sama sa mga ospital, private clinics, ug rural health units sa higayon nga sila magpa check-up o magkinahanglan og lain pang serbisyong medikal. (RGC/PIA7)
