TAGBILARAN CITY, Bohol, May 20 (PIA) -- Gilagdaan na ni Presidente Rodrigo Roa Duterte ang balaodnon nga magpahamtang og mas bug-at nga silot sa mga indibidwal nga mapamatud-ang “guilty” sa investment fraud.
Ang bag-ong silot nahisulod ubos sa Republic Act No. 11765, o Financial Products and Services Consumer Protection Act, nga nagtumbok sa investment fraud isip bisan unsang matang sa malimbongon nga “solicitation of investments” gikan sa publiko.
Nakalatid niining bag-ong balaod nga “investment fraud covers Ponzi schemes and other schemes involving the promise or offer of profits or returns that are sourced from the investments or contributions made by the investors themselves.”
Nahisulod usab dinhi ang boiler room operations ug ang pagtanyag ug pagbaligya og investment schemes sa publiko nga walay lisensiya o permit gikan sa Securities and Exchange Commission (SEC).
Ang financial product o service, sa laing bahin nagtumbok sa “products or services which developed or marketed by a financial service provider which may include — but are not limited to — savings, deposits, credit, insurance, pre-need and health maintenance organization products, securities, investments, payments, remittances and other similar products and services.”
Apil usab dinhi ang digital financial products o services nga adunay kalabotan sa lapad nga sakop sa financial services nga may “accessed” ug gi-deliver pinaagi sa digital channels.
Ubos niining balaod nga gilagdaan niadtong Mayo 6, ang bisan kinsang mapamatud-ang “guilty” nga nakahimo og investment fraud mabilanggo og usa hangtod lima ka tuig o magmulta og P50,000 hangtod P2 milyon o pareho.
Susama usab ang silot nga maatubang sa korporasyon o juridical entity, directors, officers, employees, o uban pang opisyal nga direktang responsable sa investment fraud.
Idugang pa dinhi ang bug-at nga multa o silot nga P10,000 sa matag adlaw sa padayon nga paglapas ug dugang sa uban pang administrative sanctions ubos sa Section 54 sa Republic Act No. 8799 o Securities Regulation Code ipahamtang usab. (ECB/PIA7 Bohol)
