TAGBILARAN CITY, Bohol, May 31 (PIA) -- Giklaro sa Department of Health (DOH) nga wala pay bakuna sa pagkakaron nga nahatagan og emergency use authorization ang Food and Drugs Administration (FDA) batok sa monkeypox virus.

Apan matud pa ni DOH Kalihim Francisco Duque III, makigdiskusyon na ang DOH sa World Health Organization (WHO) kun asa makapalit ang nasod og monkeypox antivirals kun magka-outbreak sa nasod.

Giseguro usab sa kalihim nga ilang gitan-aw ang tanang posibleng available resources ug legal nga pamaagi aron makapalit og monkeypox vaccines.

Kalabot niini, giingong gimanduan na ang Pharmaceutical Division sa DOH nga makig-alayon sa Research Institute for Tropical Medicine (RITM) ug FDA alang sa mga posibleng anaa nga mga tinubdan sa monkeypox vaccines.

Sa pagkakaron, gi-andam na sa DOH ang supply chains ug logistic services.

Gipahayag usab ni Duque ang posibilidad sa paggamit sa Imvamune o Imvanex vaccine nga adunay lisensya sa Estados Unidos aron mapugngan ang monkeypox o smallpox.

Kahinumdoman nga una nang gipahayag sa DOH nga dili pa available sa tibuok kalibotan ang bakuna batok sa monkeypox. (ECB/PIA7 Bohol)