TAGBILARAN CITY, Bohol, June 1 (PIA) -- Palobohon sa Department of Agriculture Region 7 ang P50M nga monolithic dome nga maoy himoon nga balay pundohanan ug tipiganan sa mga liso sa humay igtatagod, didto sa Ubay Stock Farm, Hunyo 1.

Gitukod agi og pagtuban sa suliran sa dali makuha nga de-kalidad nga matang sa igtatagud alang sa mga tigpananum og humay sa Bohol, ang DA -7 nagtutok karon sa pag-himo sa Bohol nga mas kasaligan pa nga sentro sa produksyon sa humay sa Central Visayas.

Ang monolithic domes gituyo og pabarug gamit ang pulido nga teknolohiya sa steel-reinforced concrete ug polyurethane foam insulation nga maoy kabatan sa airform.

Sa iyang desinyo, nasuwayan na kini nga molungtad sa bagyo kay igo lamang modailos ang hangin sa lingon nga atop niini, gawas pa nga dili sudlog sa anay ug mga dangan.

Giingon nga barato nga teknolohiya nga misanong sa panginahanglan sa kalikopan, ang monolithic domes, sayun rang imintinar ug dyutay rag enerhiya ang gikinahanglan aron magpa-init o magpabugnaw sa iyang sulod.

Ang monolithic dome nga paboroton dinhi sa Bohol maoy kinaunhan nga ingon niining isktraktura sa Central Visayas ug ang labing dako nga makit-an sa tibuok Pilipinas.

Segun sa DA-7, ang monolithic dome sa Bohol makahimo nga magtipig sa 983,500 ka kilo nga tipasi binhi-on.

Gawas sa mga tag-as nga kalidad sa binhi-on nga isulod dinhi, mahimo usab kini nga himoong tipiganan sa mga lubang ug karaang binhi sa humay nga anad na sa mga kamad-an ug sawod nga basakan. (rahc/PIA7 Bohol)